మూఢనమ్మకాల నిషేధచట్టం రావాలి

చేతబడుల నిషేధచట్టం రావాలి

‘అమానవీయ సాంఘిక చర్యలు, చేతబడి నివారణ, నిర్మూలన బిల్లు-2017’ ను కర్ణాటక శాసనసభ ఆమోదించినా మూఢనమ్మకాల విషయంలో దేశంలో ఎలాంటి మార్పు రాలేదు.భారత రాజ్యాంగంలోని 51-A (h)  పౌరుల ప్రాథమిక విధుల  ప్రకారం ‘‘ప్రతి పౌరుడు ఇతరులలో శాస్త్రీయ దృష్టినీ, మానవతా వాదాన్నీ, పరిశోధనాసక్తినీ, సంస్కరణాభిలాషను పెంపొందించేందుకు కృషిచేయాలి.’’ మూఢ, అనాగరిక విశ్వాసాలకు వ్యతిరేకంగా పౌరులందరూ ప్రచారం చేయాలి.ఈ చట్టం ప్రకారం అమానవీయ చర్యలను శిక్షించదగిన నేరాలుగా పరిగణిస్తారు.
మూఢనమ్మకాల పనిపట్టేలా ప్రత్యేక చట్టం కోరుతూ జనవిజ్ఞాన వేదిక వంటి సంస్థలు ఆందోళన బాటపట్టాయి. నరేంద్ర ధబోల్కర్‌, కల్బుర్గీ, పన్సారే, గౌరీ లంకేశ్‌ లాంటి మేధావులను దుండగులు హతమార్చారు. జయలలిత,బీజేపీ మీద విపక్షాలు చేతబడి చేయించారని ఎంపీ ప్రజ్నాసింఘ్ లాంటివారు వాపోతే దమ్ముంటే నాపైన చేతబడి చేయండని మంత్రి కామినేని శ్రీనివాస్  సవాలు విసిరారు. ఈ కుతంత్రాలకు కఠిన చట్టాలే విరుగుడు అని జాతీయ మహిళా కమిషన్‌ సూచించడంతో- ఝార్ఖండ్‌, ఛత్తీస్‌గఢ్‌, ఒడిశా, బిహార్‌, మహారాష్ట్రలు మూఢనమ్మకాల్ని నిరోధించే చట్టాల్ని ప్రవేశపెట్టాయి. మంత్రగత్తె అని అనుమానించి ఏ మహిళకైనా శారీరక హాని కలిగిస్తే, దోషులకు గరిష్ఠంగా అయిదేళ్ల కారాగారవాస శిక్ష పడేలా బిహార్‌ 1999లో చట్టం తెచ్చింది. గ్రామాల్లో దురాచారాలు, దురాగతాలకు కారకులయ్యే వ్యక్తులకు జరిమానాతో పాటు మూడేళ్ల శిక్ష విధిస్తూ 2013లో బిహార్‌ ప్రభుత్వం చట్టం చేసింది. మహరాష్ట్ర ప్రభుత్వం అమానవీయంగా ప్రవర్తించేవాళ్లకు ఏడేళ్ల జైలుశిక్ష, క్షుద్రపూజలపై నిషేధం విధిస్తూ 2013లో  చట్టాన్ని తీసుకొచ్చింది. ఏ వ్యక్తినైనా శారీరకంగా మానసికంగా సామాజికంగా హింసించి ఆత్మహత్యకు పురికొల్పేలా చేసిన నేరగాళ్లకు యావజ్జీవ శిక్ష  అమలులోకి తెస్తూ  2015లో అసోం చట్టం చేసింది. ఈదురాచారాల  నివారణకు  పటిష్టమైన చట్టమే మార్గమని జాతీయ మహిళా కమిషన్‌  సూచించింది. భారత రాజ్యాంగం నిర్దేశించిన విధంగా ప్రతి పౌరుడూ శాస్త్రీయ దృష్టినీ, మానవతా వాద భావాలనూ, పరిశోధనాసక్తినీ, సంస్కరణాభిలాషనూ పెంపొందించడానికి కృషిచేయాలి.అమానవీయ సాంఘిక చర్యలు, చేతబడి దురాచారాలు,అనాగరిక, అశాస్త్రీయ విశ్వాసాలు అన్నిటినీ నిషేధించాలి.

 మంత్రాలతోనే రోగాలు నయంచేస్తామనీ, ఎలాంటి పరికరాలూ లేకుండా ఒట్టి చేతులతోనే శస్త్ర చికిత్సలు చేసి శరీరంలోని కణుతులను తీసేస్తామని మోసంచేస్తున్నారు. దెయ్యం విడిపిస్తామంటూ జనాన్ని చిత్రహింసలకు గురిచేయడం, గుప్త నిధులకోసం నరబలులూ, క్షుద్రపూజలు చేయడం, నగ్న పూజలు, గర్భంలోని శిశువు ఆడపిల్ల అయితే మగపిల్లవాడిగా మార్చేస్తామనే పేరుతో మోసాలు చేస్తున్నారు , అగ్నిగుండాలలో నడుస్తున్నారు. కొన్ని  దేవాలయాలలో తమ దుష్కర్మలు నశిస్తాయనీ, రుగ్మతలు తొలగిపోతాయని ‘మడె స్నాన’ ‘పులివిస్తర’ (ఎంగిలాకు), దురాచారం  పాటిస్తారు.కర్ణాటక ప్రభుత్వం మడె స్నానను నిషేధించింది. తెలుగు రాష్ట్రాలలో బాణామతి లేక చేతబడి పేరిట చాలా దౌర్జన్యాలు, మోసాలు జరుగుతున్నాయి.తమకు లొంగని  కుటుంబాన్ని సాధించదలచిన గ్రామ పెత్తందార్లు ఆ అమాయకుల ఇండ్ల ముందు తమ మనుషులతో రాత్రికి రాత్రే పసుపు, కుంకుమ, నిమ్మకాయలు వేయించి, వారికి మంత్రగాళ్లనే ముద్రవేసి, వారి జుట్టు గొరిగించి, పళ్ళు ఊడగొట్టించి వీధుల్లో నగ్నంగా ఊరేగించి కసి తీర్చుకుంటున్నారు.చేతబడి చేస్తామని, ఇతరులు చేసిన చేతబడిని తిరగగొడతామనీ ఇంకొందరు  సొమ్ముచేసుకుంటున్నారు. పక్షవాతం కారణంగా కోమాలో ఉన్నవారిని ఎవరో చేతబడి చేసిన కారణంగానే వారలా అయ్యారని చెబుతారు. కొందరు అమ్మలూ, అవధూతలూ, బాబాలూ, స్వాములూ  రాజకీయ దళారులుగా, కొందరు డేరా బాబాలు అక్రమార్జనాపరులకు రహస్య ధనాగారంగా మారుతున్నారు.అత్యాచారాలు చేస్తున్నారు.

స్వామిజీలను ఆధ్యాత్మిక గురువులను, బాబాలను ఆశ్రయిస్తున్న వారి సంఖ్య పెరిగేకొద్దీ  కొందరు స్వార్థపరులు స్వామిజీల అవతారం ఎత్తి ప్రజలను మోసం చేయడమేకాక చేయరాని పనులు కూడా చేస్తున్నారు.కొందరు తమ ఆశ్రమాలకోసం ప్రభుత్వ భూములను ఆక్రమిస్తున్నారు. నిత్యానందస్వామి పోలీసులకు చిక్క కుండా విదేశాలకు వెళ్లి ఏకంగా ఒక ద్వీపాన్నే కొనుగోలు చేసి అక్కడ స్వతంత్రంగా కైలాస రాజ్యాన్ని ఏర్పాటు చేస్తున్నారట. అన్నివేల కోట్ల రూపాయలు ఎలా కూడబెట్టగలి గాడు?ఎంతమందిని మోసం చేశాడు? ఎలా తప్పించుకొని విదేశాలకు వెళ్లిపోయాడో మరి? ఇక మరికొందరు స్వామిజీలు, బాబాలు జైళ్లల్లో కాలం గడుపుతున్నారు.భక్తి కూడా ఒక వ్యాపారంగా మారి పోయింది. పెట్టుబడి పెట్టకుండా కుబేరులుగా మారడానికి బాబాలు కావటం దగ్గరదారి అయ్యింది.

ఎక్కడపడితే అక్కడ స్వామిజీలు, బాబాలు వెలుస్తున్నారు ఏవేవో చెప్పి ప్రజలను నమ్మిస్తున్నారు. కొందరు చేసే వికృతచేష్టలు అమాయకుల ప్రాణాల మీదకు కూడా తెస్తున్నాయి. మంత్రాల పేరుతో రోగాలను నయం చేస్తామంటూ కిందపడేసి తొక్కడం, వాతలు పెట్టడం ఇష్టానుసారంగా కొట్టడం ఒకటేమిటీ వారికి తోచిన అటవిక చర్యలన్నీ చేస్తున్నారు.భైరవకోనలో గుప్తనిధులకోసం అమావాస్య నాడు క్షుద్రపూజలు నిర్వహిస్తున్నవారిని  పోలీసులు పట్టుకున్నారు.ఆలయఅధికారిని సస్పెండ్‌ చేశారు. కదిరి కొర్తికోటలో క్షుద్రపూజలు చేస్తూ ముగ్గురిని బలి ఇచ్చారు.బలికి గురైనవారిలో ఇద్దరు మహిళలు కాగా ఒక పురుషుడు ఉన్నారు. చేతబడులతో ప్రాణాలు తీస్తున్నారు. క్షుద్రపూజలతో  దేశంలో పదేళ్లలో రెండువేలకుపైగా హత్యలు జరిగాయట.ఒక్క జార్ఖండ్‌లోనే  చేతబడులు చేశారనే అనుమానంతో 58 మందిని మట్టుపెట్టారు. మహారాష్ట్రలో విదర్భలో పుత్రసంతానం కోసం 11 మంది చిన్నారులను బలి ఇవ్వాలన్న భూతవైద్యుడి సలహా ప్రకారం ఐదుగురు పసికందులను పొట్టనపెట్టుకున్నారు.భూతవైద్యులు,క్షుద్ర పూజలు చేసే పూజారుల సలహాలు విని నరబలులు కూడా ఇచ్చారు . భార్య ఆరోగ్యంకోసం, పక్షవాతం నయమౌతుందని, కొడుకు పుట్టాలనే ఆశతో యాగంచేసిమరీ పసిపాపలను బలి ఇచ్చారు.కొత్త పొక్లైయినర్‌కు నరబలి , గంగాలమ్మ తల్లికి ఒక మహిళను బలిచ్చారు.అత్యాచారం చేసినతరువాత మహిళలను తగలబెడుతున్నారు.

క్షుద్రపూజలపై జాతీయ స్థాయిలో చట్టం తేవాలని కేంద్రం సన్నాహాలు చేసింది . చేతబడులు, బాణామతి, క్షుద్రపూజలంటూ ప్రజల్ని మోసం చేసే వారికి కఠిన శిక్షలు పడేలా ఆయా రాష్ట్రాల్లో ఉన్న చట్టాల గురించి తెలపాలని  అన్ని రాష్ట్రాలకూ లేఖ రాసింది. క్షుద్రపూజలను నమ్మి మోసపోవద్దంటూ కొన్ని  సామాజిక సేవా సంస్థలు ప్రచారం చేస్తున్నాయి మూఢనమ్మకాలను పాటించేవారు ఆ సంస్థ కార్యకర్తలను చంపేశారు. హైదరాబాద్‌లో కూడా క్షుద్రపూజలు చేస్తామంటూ వచ్చి ఓ ఇంట్లో సొమ్మంతా దోచుకుపోయారు. దీనిపై ప్రత్యేక చట్టం లేనందున పోలీసులు కూడా దీన్ని నేరం కింద పరిగణిచలేకపోతున్నారు. బాధితులు ఎవరైనా ఫిర్యాదు చేస్తే, క్షుద్రపూజలు చేసినవారిపై కేవలం మోసం కేసు మాత్రమే పెట్టగలుగుతున్నారు. గతంలో  కొంతమంది ఎంపీలు ప్రజలు ఇంతలా మోసపోతున్నా, భాదపడుతున్నా ఎందుకు చట్టం తేలేదని ప్రశ్నించారు. దీంతో కదిలిన కేంద్రం.. చేతబడి, క్షుద్రపూజల నియంత్రణకు దేశవ్యాప్తంగా ఓ కొత్త చట్టాన్ని తీసుకొచ్చేందుకు నడుం బిగించింది.ఇంకా బిల్లు రావాలి. దేవుళ్లకు, దెయ్యాలకు బలులిస్తే తమ కోరికలు నెరవేరుతాయని ఇప్పటికీ కొంతమంది జనం నేరమనస్తత్వంతో  నమ్ముతున్నారు. జంతువులు కన్నా నరబలి ఇస్తే తమ కోరికలు నెరవేరుతాయనే మూఢత్వంతో ఉన్నారు.అశాస్త్రీయమైన విషయం ఏదైనా అది మూఢవిశ్వాసమే.మనిషిలో శాస్త్రీయ దృక్పథం పెరగాలి. ఇలాంటి బలుల మూఢత్వాన్ని తిప్పికొట్టాలి.మూఢ విశ్వాసాలు తాము చేస్తున్నది ఏమిటో కూడా తెలియనంతగా మనిషిని లొంగదీసుకుంటాయి. ఇలాంటి అమానుష చర్యలు తప్పుకావని, ఫలానా గ్రంథంలో ఉంది. ఫలానా శాస్త్రంలో ఉంది అంటూ సమర్ధించుకునే మానసిక స్థితి వారిలో ఉంటుంది. జంతుబలి, నరబలి, మూఢత్వ నిర్మూలనకు విస్తృతమైన ప్రచారం జరగాలి.

---నూర్ బాషా రహంతుల్లా

విశ్రాంత స్పెషల్ గ్రేడ్ డిప్యూటీ కలక్టర్ ,6301493266
 https://www.facebook.com/photo.php?fbid=2844906868874618&set=a.233025936729404&type=3&theater

స్త్రీ బాల వృద్ధులను చట్టాలతో కాపాడాలి

స్త్రీ బాల వృద్ధుల తెగవేత ఆపాలి  

స్త్రీలు దేవతలుగా కొలవబడతారని చెప్పుకునే దేశంలో ఆడబిడ్డను కనేందుకు తల్లిదండ్రులు ముందుకురావటం లేదు. దుర్మార్గులకు మహిళలు,పసిపిల్లలు,వృద్ధులు బలౌతున్నారు.ఏడేళ్ళ చిన్నారి దీప్తిశ్రీ ఇషానిని చంపి మురుగు కాలవలో పడేసిన సవతితల్లి శాంతకుమారి 13 నెలల బిడ్డ ను సాకటానికి అమ్మమ్మ కు అప్పగించారు.సవతితల్లి చేసిన తప్పు అందరికీ శాపంగా చుట్టుకుంది. ఆ పసిపిల్ల చేసిన నేరమేంటి? రెండో పెళ్ళి ఇందుకేనా? రాక్షస సవతి తల్లిని ఏమి చెయ్యాలి? అన్నము అడిగితే వాతలుపెట్టే దొకరు, సొంత అక్క కూతురుపైనే దాష్టీకం చూపేదొకరు.నాగరీక ప్రపంచం లో నాగరికత ఏది? బాలలు,స్త్రీలపై ఈ అమానుష కృత్యాలకు అడ్డుకట్ట ఎప్పుడు,ఎలా?ఇటువంటివారికి పిల్లలు పుట్టకుండా ఆపరేషన్ చెయ్యాలి. గోడ దూకిన వాడేవడంటే ఆలు చచ్చిన వాడన్నట్లు చాలా మంది తండ్రులు తమ పిల్లల కళ్ళెదుట చక్కని మాదిరి కరమయిన జీవితాన్ని ఉంచలేకపోతున్నారు. కొంతమంది ముసలి వాళ్ళకు పశ్చాత్తాపం రాదు గదా పిల్లల్ని గూడ చెడగొడతారు. “నీ వయసే నాకుంటే ఊరిని ఇరగదీసే దాన్నికదమ్మా” అని చింతామణీదేవిని చెడ్డ పనికి ప్రోత్సహించిన అరవై ఏళ్ళ శ్రీహరికుమారి ఇందుకు చక్కని ఉదాహరణ. కల్లు కుండ ఇంట్లో నిలవపెట్టి రోజూ తప్ప తాగే తండ్రి, సారాయి షాపు పెట్టిన తండ్రి, వ్యభిచార గృహాన్ని నడిపే తండ్రి, తల్లిని చితకబాది కొంగున దాచుకున్న రూకల్ని లాక్కెళ్ళి తాగొచ్చే తండ్రి, దొంగతనమే వృత్తిగా గల తండ్రి, దున్నపోతులాంటి ఆరోగ్యమున్నా అడుక్కుతినటమే అలవాటు చేసుకొన్న తండ్రి, లంచగొండి తండ్రి తమ పిల్లలకు ఏ నీతులు బోధించగలరు? చచ్చిన దాని పిల్లలు వచ్చిన దాని కాళ్ళ క్రింద అన్నట్లు అనేక మంది పిల్లలు సవతి తల్లుల చేత రాచి రంపాన పెట్టబడుతున్నారు. రెండవ భార్యగా వస్తున్న స్త్రీ తాను తల్లి బాధ్యతను గూడా నెరవేర్చే సిద్ధపాటుతోనే రావాలి. కొత్త బార్య మోజులో పది మొదటి భార్య పిల్లల్ని ఆలనాపాలనా లేకుండా గాలికి వదిలేసే తండ్రిని ఏమనాలి ? పిల్లల్ని కనటంపై నియంత్రణ లేకుండా గుంటలో బిడ్డ, కడుపులో బిడ్డ అన్నట్లుంటుందికొందరి వ్యవహారం.పుట్టిన వాళ్ళందరినీ సరయిన రీతిలో పోషించే ఆర్ధికశక్తి లేకపోయినా దేవుడు పోషిస్తాడులెమ్మని కనేస్తారు.మంచి శీల సంపదను నేర్పరు.నారు పోసిన వాడు నీరు పోస్తాడని గాలికి వదిలేస్తారు.పది సంవత్సరాలు దాటక ముందే పిల్లల్ని కాయకష్టం చేయటానికి పంపుతారు.నారు పోసిన వాడు దేవుడు కాదు. మనిషే. నీరు పోయవలసింది కూడా మనిషే. నారు పోసిన వాడు నీరు కూడా పోస్తున్నాడా లేదా అని ఎవరు కనిపెట్టి చూస్తారు? చేసేవి లోపాలు చెప్పితే కోపాలు.తల్లి దండ్రులకేదయినా చెబితే మాకే నీతులు చెబుతావా అంటారు. విపరీతంగా తాగి ఆరోగ్యం చెడగొట్టుకొని నలభయ్యేళ్ళకే ఒకతను చనిపోయాడు ఈ మధ్య. ఆరుగురు పిల్లలు, ఇంకా యవ్వనం గడవని భార్య, ముసలి తల్లిదండ్రులు అనాధలయ్యారు. బ్రతికి బాధించారు చచ్చీ బాధించారు. అసమర్ధుల జీవితమొక వ్యాధి. బాధ్యతారహితులు,సోమరిపోతులకు నిద్ర ఉపశమనం, మరణమే ఆరోగ్యం. మరణానంతరం లెక్కఉన్నా లేకపోయినా కన్నపిల్లల్ని ఎవరూ పోషించరు.బాధ్యతలేని పెద్దవాళ్ళ కాముకత్వ కారణంగా పుట్టిన పిల్లల రక్షణ దేవుడే ఎందుకు చూసుకోవాలి? అది మూర్ఖత్వము దుర్మార్గమూ కాదా?బాలల హక్కుల కమిషన్ వంటినిండా వాతలు గాయాలతో ఉన్న ఎందరో బాలలను కాపాడింది.కన్నతండ్రులు కబోదుల్లా మారినా,తండ్రులు త్రాగుబోతులైనా పిల్లలకు నరకమే. ఇలాంటి దుర్మార్గులను వెంటనే ఉరితిస్తే మిగతా వారికి హెచ్చరికగా ఉంటుంది.చట్టాలు కూడా దుర్మార్గులకు భయాన్ని కలిగించేలా మార్చాలి.షీ టీములు నిరంతరం కదులుతూ ఉండాలి. కాలుతున్న గంజి పోసి, కర్రతో కొట్టి, చేయి విరగ్గొట్టి ,మర్మాగంపై వాతలు పెట్టి,బందించి చితకబాది,ఎవరికైనా చెబితే చంపేస్తామని బెదిరించి,ఒళ్ళుహూనం చేసి,సిగిరెట్టుతో అట్లకాడతో వాతలుపెట్టి, కిరాతకంగా చంపి,పిల్లలను అడ్డుతొలగించుకునే దుర్మార్గులను సమాజంనుండి తొలగించాలి.ఇలాంటి కిరాతకులు సంఘానికి హాని.
అత్యాచారాలకు మహిళలే కారణమనిచెప్పే భాగ్యరాజ్ లాంటి నటులు నెలల పిల్లలు కూడా ఆగమైపోతున్నారే అని ఆలోచించాలి.చీరను బురఖా లాగా మార్చి యాంటీ రేప్ చీర అని పేరు పెట్టినా అత్యాచారాలు ఆగలేదు.ప్రతిచోటా మృగాళ్ళు చెలరేగిపోతున్నారు.సంపూర్ణ మద్యనిషేధం రావాలి.లైంగిక నేరస్తులను నపుంసకులుగా మార్చే మందులు,వారికి కుటుంబ నియంత్రణ మందులు నిర్బంధంగా ఇవ్వాలి. జీవితంలో పెళ్లి , పిల్లలు, కుటుంబం ప్రతి మనిషికీ ఓ వరం.అందమైన జీవితాన్ని ఆస్వాదించడానికి, అనుభవించడానికి పిల్లల్ని కంటారు.పుట్టబోయే బిడ్డ మగ అయితే ఊరుకుంటున్నారు.ఆడబిడ్డఅయితే అబార్షను చేపిస్తున్నారు. భార్య, భర్త, బిడ్డ, తల్లిదండ్రులు, అన్నదమ్ములు, అక్కాచెల్లెళ్లు,వీరందరితో కలిసి జీవించటానికి మనిషి ఇష్టపడటం లేదు. స్వార్థం, ఈర్ష్య అసూయల్లో కొట్టుమిట్టాడుతున్నారు.కామంతో కళ్లుమూసుకుపోయి ప్రవర్తిస్తున్నారు. రొమ్ములుకోసి ,పళ్లుపీకి,మర్మాంగంలో చెయ్యి జొనిపి ,చిత్రహింసలు పెట్టి మహిళలను చంపిన కేసులున్నాయి.ఆయేషా మీరా, ప్రత్యూష,ఇంకా అనేకమంది ఆడపిల్లలపై జరిగిన హత్యాచారాలకూ శిక్షలు పడ లేదు.వాళ్ళ తల్లిదండ్రులు నేటికీ ఏడుస్తూ తిరుగుతున్నారు. కొన్నేళ్లక్రితం జ్యోతీసింగ్ అనే మెడికల్ స్టూడెంట్ అత్యాచారం తర్వాత నిర్భయ చట్టం వచ్చినా స్త్రీలు నిర్భయంగా తిరగలేని దుస్థితి పోలేదు.జనం తిరిగే దారిలో లారీ అడ్డంపెట్టి ఒక మహిళా డాక్టర్ ను రేప్ చేసి చంపారట.వాళ్ళంతా 25 ఏళ్ల లోపువాళ్లేనట.అదే రోజు మరో అమ్మాయిని రప్పించి ఊరంతా తిప్పి చంపారట.హైదరాబాదు లో ప్రియాంకా రెడ్డి,హనుమకొండ లో మానసలపై హత్యాచారాలు బ్రతుకంటేనే భయ పడేలా చేస్తున్నాయి. పిల్లలను వ్యభిచారంలోకి దింపి పాపపు సొమ్ము గడించే ముఠాలను ఎవరు ఎప్పుడు అరికడతారు? ఈ దేశంలో ఆడపిల్లగా పుట్టడమే నేరమా? ఆడ పిల్లల్ని కంటే ఎలా కాపాడుకోవాలో అని తల్లిదండ్రులు ఆందోళనకు గురౌతున్నారు. ఆడపిల్ల హత్యను చూడకుండాపోయిన ప్రయాణించిన ప్రజలదా వెంటనే స్పందించని పోలీసులదా ?అని విలేకరులు తెగ ఆలోచిస్తున్నారు.నాగరికులు రౌడీల నుండి తమనుతాము రక్షించుకొటానికే సతమతమౌతున్నారు.మహిళలు బాలికలపై నిరంతరం అత్యాచారమో హత్యాచారమో జరుగుతూనే ఉన్నాయి. ఆడవాళ్లకి మనుగడలేదు. మగ చూపులనించి రక్షణలేదు. ఆడదాని కష్టాలు ఆడదానికే తెలుస్తాయి అంటారు.కానీ అత్యాచారాలు ఈ భూమి పుట్టినప్పటినుంచి జరుగుతున్నాయి అని కొందరు మహిళా నాయకులే చవకగా మాట్లాడుతున్నారు.భయం పుట్టే చోట ఆడపిల్లలు ఉండకూడదు. ప్రాణం కంటే వాహనాలు ముఖ్యంకాదు.పారిపోవాలి,పారిపోవటం నేరం కాదు.చిన్నపిల్లలను కూడా బలితీసుకుంటున్నారు. వయసుతో పనిలేకుండా మైనారిటీ తీరని బాలురు మొదలు అరవైఏళ్లు దాటిన ముసలివాళ్లు కూడా అత్యాచారాలు చేస్తున్నారు. సవతి తల్లుల ఆగడాలు,పిల్లల కిడ్నాపులు చంపటాలు లాంటి ప్రమాదాలు ఎదురైనప్పుడు 100,112,181,1090,1091 లాంటి మా హెల్ప్ లైన్లకు ఫోన్ చెయ్యండి అని పోలీసు అధికారులు చెబుతున్నారు. ఐరాస ప్రధాన కార్యదర్శి అత్యాచార నిందితులకు ఉరిశిక్ష వేయమని భారత ప్రభుత్వానికి సూచించారు.కేంద్రమంత్రి కిషన్ రెడ్డి మొదలు చాలామంది పెద్దలు,సామాన్య గృహిణులు ఇలాంటి హత్యాచారులను నడిరోడ్డుపై కసబ్ లాగా ఉరితీయ్యాలి లేదా వెంటనే కాల్చి పారెయ్యాలి అన్నారు. వరంగల్లు యాసిడ్ దాడి నిందితుల్ని ఆనాడు కాల్చేస్తే ఎవరూ ఏమీ అనలేదు.హత్యాచార నిందితుల్నికూడా అలా చంపేయ్యాలన్నదే ప్రజావాక్యం.కీడు శంకించిన అబలలు వెంటనే అత్యాచారుల ఫోటో తీసి వాట్సప్ లో తమ ఏరియా పోలీసులకు పంపాలి.తాము ఎక్కడ ఆపదలో ఇరుక్కున్నారో పోలీసులకు ఆ యాప్ ద్వారా తెలిసిపోతుందట. షీ టీములు , పోలీసులు కూడా వెంటనే స్పందించాలి.మన చట్టాలను కూడా కఠిన శిక్షలు పడేలా మార్చుకోవాలి. ప్రజలు ఇచ్చే మంచి సలహాలు పాటించాలి.మనతోటి ప్రజలను దుష్టులనుండి కాపాడాలి.దుష్ట శిక్షణ సజ్జన రక్షణ నిరంతర ప్రక్రియ.
నూర్ బాషా రహంతుల్లా ,విశ్రాంత స్పెషల్ గ్రేడ్ డిప్యూటీ కలక్టర్ ,6301493266

అర్జీలపై స్పందన పెరగాలి

                                                        అర్జీలపై స్పందన పెరగాలి

మీరంతా బాధ్యతగా ఒక ఏడాది పాటు పనిచేస్తే అర్జీల సంఖ్య తగ్గిపోతుందని ముఖ్యమంత్రి సలహాదారు అజేయ కల్లం తహసీల్దారులు ఆర్డీవోలను ఉద్దేశించి అన్నారు. డీజీపీ గౌతమ్ సవాంగ్ మహిళలు కూడా పోలీసు స్టేషన్ కు దైర్యంగా వచ్చి ఫిర్యాదులు ఇస్తున్నారని అన్నారు.అర్జీతో వచ్చినమనిషిని ఎలా ట్రీట్ చేస్తామన్నది ముఖ్యమని మనమంతా ప్రజాసేవకులమని జగన్ గారు చెప్పారు. కడప డీ యస్పీ సూర్యనారాయణ స్పందన కార్యక్రమలో అర్జీదారులకు భోజనం పెట్టి మరీ అర్జీలు నమోదు చేయిస్తున్నారట.అర్జీ ఒకందుకు ఇస్తే పరిష్కారం మరొకటి చూపించారని మరికొంతమంది జిల్లా అధికారులు అర్జీలను రాసిపెట్టేవాళ్లను అక్కడ పురమాయించారు. ప్రతి అర్జీపై అధికారులను నిర్ణీత సమయం లోపల స్పందించమని ముఖ్యమంత్రి కోరారు.అవినీతి,ఆలశ్యము లేకుండా వ్యవస్థను కడిగేద్దామని ఉద్బోధించారు. స్పందన కార్యక్రమానికి అపూర్వ స్పందన లభించింది. అధికారులు పరిష్కారాలు కూడా అంతేస్థాయిలో ప్రజలకు అందిస్తారని కోరుకుందాం.పూర్వం రాజుగారు ప్రజలు పడుతున్న పాట్లు స్వయంగా తెలుసుకోవటానికి మారువేషంలో తిరిగేవాడట.ప్రజలమధ్య పాదయాత్రలు చేసి అక్కడికక్కడే సమస్యలు పరిష్కరించేవాడట.ఇంకోరాజు కోట గుమ్మందగ్గర ధర్మగంట బిగించాడట. ఎవరైనా బాధితుడు వచ్చి ఆ గంట మోగిస్తే రాజుగారు బయటకొచ్చి బాధితుని మొరవిని న్యాయం తీర్చేవాడట. ప్రజాస్వామ్య దేశంలో ప్రజల ఫిర్యాదులపట్ల ప్రభువులు తప్పక స్పందించాలి.
అంతులేని సమస్యలు
రేషన్‌ కార్డు లేదని.. పాఠశాల, కళాశాలల్లో అధిక ఫీజులు వసూలు చేస్తున్నారని.. పింఛన్లు, తాగునీరు, రోడ్లు, భూ ఆక్రమణలు.. ఇలా ఏదో ఒక సమస్యతో ప్రజలు ఇబ్బందులు పడుతుంటారు. మండల స్థాయిలో ఉన్న అధికారులను కలిసి వారి సమస్యలను విన్నవించుకుంటారు. అయితే ఆ స్థాయిలో వారి సమస్యలకు పరిష్కారం దొరకకపోవడంతో ప్రతి సోమవారమూ కలెక్టరేట్‌కు వస్తుంటారు. కలెక్టర్‌కు తమ సమస్యలను విన్నవించుకుంటే పరిష్కారం దొరుకుతుందని ఆశపడుతుంటారు.ఇప్పటివరకు ప్రజావాణి,మీకోసం,ప్రజావేదిక,ప్రజలవద్దకు పాలన,రచ్చబండ లాంటి రకరకాల పేర్లతో పాలకులు ప్రజల సమస్యలు తీర్చటానికి ప్రయత్నించారు.అదే కోవలో నేటి ముఖ్యమంత్రి జగన్మోహన్ రెడ్డి ప్రజా సమస్యల పరిష్కార కోసం స్పందన అనే కార్యక్రమం ఏర్పాటుచేశారు.కొత్తజిల్లాల ఏర్పాటుతో ప్రజాఫిర్యాదులకు స్పందించే కలక్టర్ల సంఖ్య పెరుగుతుంది, స్పందనాకేంద్రాలు ప్రజలకు దగ్గరకొస్తాయి.దూరం భారం తగ్గుతాయి. పనులు త్వరగా అవుతాయి. అయితే ముఖ్యమంత్రి నివాసం వద్ద ప్రజాదర్బార్,కలక్టరేట్ల దగ్గర స్పందన కార్యక్రమం రెండూ సమాంతరంగా జరుగుతూ ఉంటే దూరప్రాంతాలనుండి ప్రయాణం చేసి మరీ జనం ప్రజా దర్బార్ కే వస్తారు.అర్జీ రాజుగారికిస్తేనే తృప్తి.
అన్ని జిల్లాల కలెక్టరేట్లలో ప్రత్యేకంగా కుర్చీలు వేసి అర్జీదారులను కూర్చోబెట్టి ఆయా శాఖల అధికారుల ఎదుట తక్షణమే సమస్యలను పరిష్కరిస్తున్నారు.నెల్లూరు కలక్టరు ఒక వికలాంగుడికి స్పందన కార్యక్రమంలోనే మూడు చక్రాల కుర్చీ అందజేస్తే అర్జీదారుడు ఆనందంతో తబ్బిబ్బు అయ్యాడట. ప్రజల నుంచి అర్జీలను స్వీకరించి వారి ఎదుటే వాటిని పరిష్కరించటం విశేషమే. ఎందుకంటే ఇప్పటివరకు జరిగిన ఫిర్యాదుల దినాల్లో ప్రజల అర్జీలను నమోదు చేశారు.అర్జీదారులందరికీ రశీదులు కూడా ఇచ్చారు.అర్జీదారులను కూర్చోబెట్టి ఆయా శాఖల అధికారుల ఎదుట తక్షణమే సమస్యను పరిష్కరిస్తామనటమే ఈ కార్యక్రమంలో గొప్పతనం.తక్షణమే పరిష్కరించకపోయినా ఫలానా తేదీ లోగా సమస్యను పరిష్కరిస్తామని రశీదులు ఇచ్చారు.అధికారులు ఇచ్చినమాట నిలుపుకుంటే కార్యక్రమం విజయవంతమౌతుంది.
తీసుకున్న వినతుల్ని ఎక్కడ పెట్టామో తెలియని అయోమయ దశ ఉండకూడదు.తీసుకున్న ప్రతిఅర్జీకి ఒక లెక్క ఉండాలి.అర్జీదారుని పట్ల బాధ్యత ,సానుభూతి ఉండాలి.జవాబుదారీ తనం లేని బద్దకస్థులు,జాప్యగాళ్ళు,లంచగొండులు పనులు సకాలంలో చేయకుండా ప్రజలను పీక్కుతింటున్నారు. రైతులు పాస్ పుస్తకాలు రాక ఆత్మహత్యలు చేసుకోబోవటం,ఉద్యోగులు రిటైర్ అయ్యి ఏళ్ళుగడిచినా పెన్షన్,గ్రాట్యుటీ రాకపోవటం,సొంత ఆఫీసులో వాళ్ళే పనులు చెయ్యకపోవటం వార్తల్లో చూస్తున్నాం. ఇలాంటి సభ్యత సంస్కారం లేని లంచగొండులను వెంటాడి పట్టుకోవాలి.కనీసం వాళ్ళు తీసుకున్న దరఖాస్తులను ఎన్నిరోజుల్లో పరిష్కరించాలో ఎన్నాళ్ళకు పరిష్కరించారో ఎందుకు ఇంత జాప్యం చేశారోజవాబు చెప్పే వ్యవస్థ ఉండాలి.అసలు తనక్రింది ఉద్యోగులను ఇలాంటి ప్రశ్నలు నిలదీసి అడగాలంటే శాఖాధికారి దగ్గర వివరాలు ఉండాలికదా? అర్జీలు పెరిగి పోతున్నాయి.సమాచారహక్కు ,వినియోగదారుల హక్కు చట్టాల పుణ్యాన సమాధానాలు ఇస్తున్నారు.సిబ్బంది కూడా పెరగాలి. మోసం లేకుండా ఉద్యోగం శ్రద్ధగా చేయటానికి అవకాశాలు పెంచాలి. కార్యాలయాలలోని పనులలో రాజకీయ నాయకుల జోక్యం తగ్గాలి.సిబ్బందికి వారు చేసే పనిలో పరిజ్ఞానం పెరగాలి. అనవసరమైన పనులకు ఆర్భాటాలు ప్రచారాలు తగ్గాలి. సమీక్షలకు సమయాలు కచ్చితంగా పాటించాలి.ఎవరు చేయ వలసిన పనిని వారిని చేయ నివ్వాలి.పెరిగిన సాంకేతికత కంప్యూటర్లతో పని వేగం..నిబద్ధత.. స్వచ్ఛత... కనపడాలి.మార్పు అందరిలోనూ వచ్చింది.ప్రభుత్వాధికారులు కూడా ప్రజలలో భాగమే. బాల్యం నుండే నీతిని బోధించాలి. ఎవరి స్వార్ధం వారిది.ఎప్పటి కప్పుడు వారి వారి అవసరాలు తీరిపోవాలి.సమాజం ఏమైనా పరవాలేదు చెడ్డ లక్షణాలు ప్రజలలో కూడా ఉంటాయి కాబట్టే పోలీస్ స్టేషన్లు, కోర్టులు. విత్తనాన్ని బట్టే ఫలం.
శాఖాధిపతుల కార్యాలయాల్లో కూడా స్పందన జరగాలి
సోమవారం కలక్టర్ల దగ్గర జరిగే స్పందనలో జిల్లా స్థాయిలోని సమస్యలే దాఖలవుతాయి.జిల్లాస్థాయిలో తేలని విషయాలు,శాఖాధిపతులకే చెప్పుకోవలసిన విషయాలు,శాఖాధిపతుల కార్యాలయాల్లోనే పేరుకుపోయిన విషయాలు కొన్ని ఉంటాయి.ఇప్పుడు ఆ అవకాశం కల్పిస్తూ వివిధ శాఖల డైరెక్టర్లు,కమీషనర్లు ఈ కార్యక్రమాన్ని సొంతం చేసుకోవాలి. స్పందన కార్యక్రమాన్ని శాఖాధిపతుల కార్యాలయాల్లోకూడా జరపాలి. శాఖాధిపతుల కార్యాలయాల్లో కూడా అర్జీలు తీసుకొని వారి స్థాయిలో పరిష్కార ప్రయత్నం చెయ్యాలి. లేకపోతే ప్రతివిషయానికీ అర్జీ తీసుకొని సచివాలయంలోని సెక్రెటరీలు, మంత్రుల దగ్గరకు,ముఖ్యమంత్రి నివాసానికి జనం వెళ్ళలేరు. అనంతపురం నుండి వచ్చిన విశ్రాంతమ్మ తోపులాటలో స్పృహ తప్పిపడిపోయిన సమస్య మళ్ళీ రాకుండా చూడాలి.ముఖ్యమంత్రిగారికి స్వయంగా అర్జీ అందిస్తేనే త్వరగా పని జరుగుతుందనే అపోహ పోవాలి.స్పందనలో అందుతున్న అర్జీల పరిష్కారం ఎంత బాగా జరిగితే అంతబాగా ప్రజలు అధికారులను నమ్ముతారు.జిల్లా అధికారులు అర్జీలను చక్కగా పరిష్కరిస్తూ ఉంటే రాష్ట్రం నలుమూలలనుండి ప్రజలు తాడేపల్లి పరుగెత్తరు.కొడుకు విదేశీ విద్య ఉపకారవేతనం కోసం దరఖాస్తు లాంటివి ఇవ్వటానికి కూడా ఎంతోదూరం ప్రయాణం చేసి ముఖ్యమంత్రి నివాసం దాకా రాకూడదు. జిల్లాల్లో స్పందన విజయవంతం అయితే రాజధానికి ప్రజల ప్రయాణం తగ్గుతుంది.
పెండింగ్ అర్జీల పై నిరంతర పరిశీలన జరపాలి
జిల్లా కార్యాలయ మాన్యువల్ లో ఫైళ్ళ నిర్వహణ,పెండింగ్ ఫైళ్ళ పరిష్కారం పద్ధతులు సవివరంగా ఉన్నాయి.దానిప్రకారం ప్రతి అధికారీ తనకార్యాలయ గుమాస్తాల వ్యక్తిగత రిజిస్టర్లను నెలకొకసారి ఖచ్చితంగా సమీక్షించేవారు. అందువలన తన కార్యాలయంలో ఏ గుమాస్తా దగ్గర ఏ ఏ ఫిర్యాదులు ఎందుకు పెండింగ్ లో ఉంటున్నాయి, ఎందుకు ఆగిపోతున్నాయి తెలిసిపోయేది. జాప్యానికి అధికారే కారణం కానక్కరలేదు.కిందిస్థాయి సిబ్బంది చేసే అహేతుక జాప్యం కూడా అధికారి అసమర్ధతగానే పరిణమిస్తుంది. అందువలన ప్రతి అధికారీ తన కార్యాలయంలోని పెండింగ్ అర్జీల పై నిరంతర పరిశీలన జరపుతూనే ఉండాలి.జాప్యం లేకుండా అర్జీలు పరిష్కరిస్తూనే ఉండాలి. శాఖాధిపతుల కార్యాలయాల్లో కూడా స్పందన కార్యక్రమం జరగాలి.సోమవారం కలక్టర్ల దగ్గర జరిగే స్పందనలో జిల్లా స్థాయిలోని సమస్యలే దాఖలవుతాయి.జిల్లాస్థాయిలో తేలని విషయాలు,శాఖాధిపతులకే చెప్పుకోవలసిన విషయాలు కొన్ని ఉంటాయి.శాఖాధిపతుల కార్యాలయాల్లో కూడా అర్జీలు తీసుకొని వారి స్థాయిలో పరిష్కార ప్రయత్నం చెయ్యాలి.అర్జీదారుని పట్ల బాధ్యత ,సానుభూతి ఉండాలి.జవాబుదారీ తనం లేని బద్దకస్థులు,జాప్యగాళ్ళు,లంచగొండులు పనులు సకాలంలో చేయకుండా ప్రజలను పీక్కుతింటున్నారు. 21వ శతాబ్దంలో కూడా ప్రజలు పనులకోసం ఏళ్ళతరబడి ఆఫీసులచుట్టూ కాళ్ళరిగేలా తిరగాల్సిరావటం ఎంత అనాగరికం? ఒకే సమస్య తీరక పదే పదే దరఖాస్తులు ఇవ్వాల్సిరావటం,లంచాలు ఇస్తేతప్ప పనికాకపోవటం , పనికాలేదనే దిగులుతో మనుషులే రాలిపోవటం,రాలిపోయిన వాళ్ళ వారసులనూ తిప్పటం లాంటి సంఘటనలు తలుచుకుంటే ప్రజలకు ఎలాంటి గతి పట్టించారో అర్ధమవుతుంది.ఇలాంటి లంచగొండులను వెంటాడి పట్టుకోవాలి.కనీసం వాళ్ళు తీసుకున్న దరఖాస్తులను ఎన్నిరోజుల్లో పరిష్కరించాలో ఎన్నాళ్ళకు పరిష్కరించారో ఎందుకు ఇంత జాప్యం చేశారోజవాబు చెప్పే వ్యవస్థ ఉండాలి.అసలు తనక్రింది ఉద్యోగులను ఇలాంటి ప్రశ్నలు నిలదీసి అడగాలంటే శాఖాధికారి దగ్గర వివరాలు ఉండాలికదా?విచారణ అదికారి ఫోనుచేస్తే పలకడు.పలికినా లంచం ఆశిస్తాడు.లంచం తీసుకొనికూడా కాలయాపన చేసి రిపోర్టు ఇస్తాడు.కనీసం జవాబు ఇచ్చే అధికారులను లబ్ధిదారులు కృతజ్నతగా చూస్తారు.ఆ అధికారి జన్మ సార్ధకమౌతుంది.కొందరు అధికారులు జన కంటకులుగానీ జీవితం గడిపేస్తారు. అర్జీదారులను చిరునవ్వుతో పలకరించి వారి సమస్యలను పరిష్కరించటం పెద్ద పాలనా సంస్కరణే. లంచం ఆశించే ఉద్యోగులను,రిపోర్టులు సకాలంలో ఇవ్వకుండా కాలయాపన చేసేవారిని వదలకూడదు.
నూర్ బాషా రహంతుల్లా
విశ్రాంత స్పెషల్ గ్రేడ్ డిప్యూటీ కలక్టర్ ,6301493266

లంచం అడిగితే కొట్టండి, లంచగొండులు ప్రజాద్రోహులు

                                  లంచగొండులు ప్రజాద్రోహులు 

లంచం అడిగితే కొట్టండి. వాళ్ళు ప్రజాసేవకులు. పనిచెయ్యని అధికారుల చేతిలో వేధింపులకు గురికావద్దు అని  కేంద్రమంత్రి నితిన్ గడ్కరీ 18.9.2019                     న దేశప్రజలకు సెలవిచ్చారు.ఇప్పుడు అది కొట్టే స్థాయి దాటి చంపే స్థాయికి వెళ్ళింది . సజీవదహనం అయిన తహసీల్దారు విజయారెడ్డి పై ఎంతమంది సానుబూతి వ్యక్తం చేశారో సజీవదహనం చేసి చనిపోయిన సురేష్ అనేరైతుఎంత బాధ పడి ఉంటాడో కదా అని రెవిన్యూ వాళ్ళ అవినీతి గురించి రైతులు పుంఖానుపుంకంగా తమ అసంతృప్తి గళాలు విప్పారు.  ఒక్క రెవిన్యూనే కాదు ప్రతి శాఖా అవినీతి మయం అయ్యిందని అందుకే కడుపుమండి భారతీయులు తయారవుతున్నారని అంటున్నారు. రెవిన్యూ సిబ్బంది లో భయం మొదలయ్యింది. కుటుంబంతో సహావచ్చి ఆత్మహత్యలు చేసుకుంటామని , విజయారెడ్డి గతే నీకూపడుతుందని కొంతమంది తహసీల్దార్లకు బెదరింపులు వచ్చాయి.ఎన్నిసార్లు ఫిర్యాదు చేసినా పట్టించుకోకపోవటమే కారణం అని చెబుతున్నారు.అడ్డంగా తాడు కడితే ఏమిటి ప్రయోజనం ? మీ అవినీతిని ఆపి ప్రజలకు పనులు చెయ్యండి అదే చాలు అంటున్నారు. సజీవదహనం తరువాత కూడా లంచాలు తీసుకోవటం ఆగలేదు.మధ్యవర్తిని పెట్టుకొని తీసుకున్నారు.అనిశావాళ్ళకు చిక్కారు.ఈ అవినీతి ఆగదు.తిరిగి తిరిగి పనికాక వేసారినవాళ్లు రాజకీయులు,అధికారుల హాహాకారాలు వినాలని ఉవ్వీళ్ళూరుతున్నారు.

ఉద్యోగస్థుడైనా సాధారణ పౌరుడైనా తనకు న్యాయబద్ధంగా రావలసిన  ప్రయోజనం రాకపోతే చాలా బాధపడతాడు.మోసానికిగురైతే మానసికంగా కుంగిపోతాడు.చెయ్యాల్సిన పనిని చెయ్యకుండా జాప్యం చేసేవారిపట్ల కోపం పెంచు కుంటాడు.కాపు కరణం నాపక్కనుంటే కొట్టరా మగడా ఎలా కొడతావో చూస్తాను?అని పూర్వం ఒక సామెత ఉండేది.ఇప్పుడు రాష్ట్రం యావత్తూ రెవిన్యూ సంఘాలు తహసీల్దార్లకు రక్షణ కల్పించాలని ఉద్యమాలకు దిగారు.డిల్లీలో రక్షకులకు రక్షణ కల్పించాలని పోలీసులు ఉద్యమించారు.ప్రజల్లో అసహనం పెరిగిపోయిందని చంద్రబాబునాయుడు వాపోయారు. రోగికి సరైన వైద్యం చెయ్యలేదని డాక్టరుని, క్లయింట్ కు సరైన న్యాయం జరుగలేదని లాయర్ల ను,తగలబెట్టుకుంటూ పోతే ఎలా?  

ప్రజలకు జవాబుదారీగా అధికార యంత్రాంగం ఉండాలి. కోట్ల రూపాయల ఖర్చుతో మొదలు పెట్టిన 'రైతులకు పట్టాదారు పాస్ పుస్తకాల పథకం' ఎన్నో లొసుగులతో నీరుగారిపోయింది. ఏదో ఒక రీతిలో పట్టా పుస్తకాలు ప్రదానం చేసి చేతులు దులుపుకోవాలన్న ఆరాటమే తప్ప ఆ పుస్తకాలు వాస్తవ స్థితిని ప్రతిబింబించాలి.ముందుగా భూముల సర్వే జరిపించాలి.భూముల సర్వే జరుపకుండా ఎప్పుడో  బ్రిటిష్ వాడు తయారుచేసిన సర్వే రిపోర్టుల ఆధారంగా పాస్ పుస్తకాల పంపిణీకి పూనుకోవటం వల్ల 'రికార్డ్ ఆఫ్ రైట్స్' అనేది ఒక ప్రహసనంగా మారింది. అప్పటి భూయజమానిగా మన తాతల పేర్లు ఉంటాయి.ప్రతి సంవత్సరం ఆడంగల్ ను తాజాపరచటం గ్రామపాలనాధికారి బాధ్యత.అది జరగటంలేదు.రెవిన్యూ వాళ్ళను భూరికార్డుల నిర్వహణకే పరిమితంచేస్తే బాగుంటుంది. రిజిస్ట్రేషన్ రుసుము  10 శాతం దాకా ఉంది. భూముల మార్కెట్ రేటు పెరుగుతూనే ఉంది.ఈ ఆర్ధిక భారాన్ని భరించలేక రైతులు క్రయవిక్రయాలను రిజిస్ట్రేషన్ చేయించుకోవటం లేదు. దస్తావేజులు రాసే వాళ్ళ దగ్గర నుంచి సబ్ రిజిస్ట్రార్ ల వరకు అంతా రైతుల నుండి డబ్బు గుంజుతున్నారు.ఎవరికివారే దస్తావేజులు రాసుకొనే పద్దతి అందుకే ప్రవేశపెట్టారు. రిజిస్ట్రేషన్ ఉచితంగా చేయాలి.  రెవెన్యూ శాఖ వద్దకు వచ్చే వాళ్లలో ఎక్కువమంది పేద రైతులు ఉంటారు.స్టాంపు డ్యూటీ కట్టలేక చాలామంది కొన్న భూములకు రిజిస్ట్రేషన్ చేసుకోరు. రిజిస్ట్రేషన్ లేకుండా రికార్డులలో పేర్లు మార్చడం కుదరదు. అది నేరం. రైతులు రెవెన్యూ కార్యాలయాల చుట్టూ ఎన్నిసార్లు తిరిగినా పనికాదు.  

రైతులందరికీ పట్టాదారు పాసుపుస్తకాలివ్వాలనే రాష్ట్ర ప్రభుత్వ సంకల్పం నెరవేర లేదు. “కుక్క దొరికితే రాయి దొరకదు. రాయి దొరికితే కుక్క దొరకదు. రెండూ దొరికితే రాజు గారి కుక్క” అన్నట్లుగా సాగుతోంది. రేషన్ కార్డుల కోసం విరగబడి వచ్చి క్యూలుగట్టే రైతులు పాసుపుస్తకాలిస్తామంటే మొఖం చాటేశారు.కాని “అవ్వను పట్టుకుని వసంతమాడినట్లు” ప్రభుత్వం రెవిన్యూ అధికార్లను పట్టుకుని ప్రగతి ఏదీ, పురోగతి ఏదీ అని నిలదీస్తున్నది. పాసు పుస్తకాలిచ్చే బాధ్యత రిజిస్ట్రేషన్ శాఖకు కూడా అప్పగిస్తే పని చాలా వేగంగా జరుగుతుంది. సవాలక్ష బాధ్యతలు తలపై వేసుకున్న రెవిన్యూ శాఖకు కొన్ని  భారాలు  తొలగించాలి. ఎన్నెన్నో ఒత్తిడుల మధ్య రెవిన్యూ అధికార్లు తమ బహుముఖ విధులను నిర్వర్తిస్తున్నారు.మంత్రులు, ముఖ్యమంత్రి ఇతర వి.వి.ఐ.పి.లు పర్యటనకొస్తున్నారంటే చాలు వారి గుండె గుభేలుమంటుంది. ప్రజా సదస్సులు, అధికార సభల నిర్వహణ భారం కూడా వారి మీదే పడుతుంది. రాత్రింబవళ్ళు శ్రమించడమే కాకుండా కొన్ని ఖర్చులు జేబు నుండే పెట్టుకోవాలి. వి.ఐ.పి.ల అతిధి సత్కార్యాల ఖర్చులకు ప్రభుత్వం ఇచ్చేది నామమాత్రం. వారికి మర్యాదలో ఏ మాత్రం లోటు వచ్చినా చీవాట్లు తప్పవు. అందువల్ల ఖర్చులన్నీ స్వయంగా భరించుకుని తంటాలు పడుతున్నారు. అయినా వీరిపై ఎవరికీ సానుభూతి ఉండదు.వి.ఐ.పి.ల ఖర్చులు ఎవరు భరిస్తున్నారో దర్యాప్తు చేయాలి. పౌరసరఫరాల కోసం ప్రత్యేక శాఖ లేదు. పని అంతా రెవెన్యూ శాఖ వారే చేస్తున్నారు. ఇందువల్ల రెవెన్యూ శాఖకు పనిభారం అధికమవుతోంది. ఈ సమస్య తీరాలంటే పౌరసరఫరాల పని భారాన్ని రెవెన్యూ శాఖ నుంచి తప్పించి పౌరసరఫరాల శాఖే స్వయంగా నిర్వహించాలి. తహసీల్దారు అడిగిన లంచం కోసం కొందరు రైతులు బిక్షమెత్తిన సందర్భాలు,కిడ్నీలు అమ్ముకున్న సందర్భాలు  ఉన్నాయి. లంచం ఇస్తేనే పట్టాదారు పాస్ పుస్తకం తయారీని వీయార్వోలు మొదలుపేడుతున్నారని ఆరోపణలు వెల్లువెత్తుతున్నాయి.  
ప్రభుత్వ కార్యాలయాల్లో ఇలాంటి లంచగొండులను ఎరివేయకపోతే బలహీనులకు పనులు జరగవు. కొంతమంది ఉద్యోగులు   విపరీతమైన కాలయాపన చేస్తున్నారు.కొందరు తప్పులతడకలుగా పనులు చేస్తున్నారు.ఇవన్నీ కలిసి కొండల్లా పేరుకుపోతున్నాయి. రాష్ట్రస్తాయి ఆఫీసుల్లో జిల్లాలోని పెండింగ్ సంస్యలపట్ల సమీక్షలు క్రమగా జరగాలి. .ప్రజలకు తమశాఖ ద్వారా జరగవలసిన పనులను ఏవి ఎన్ని పెండింగ్ లో ఉన్నాయి,ఎందుకు పెండింగ్ పెట్టారు ,ఎలా వాటిని పరిష్కరించాలి అని నెల నెలా శాఖాధిపతులు,మంత్రులు సమీక్షలు జరపాలి.ప్రతి అర్జీకి రశీదుఇచ్చి దానిమీద ముద్రించిన తేదీ లోపల పని చేస్తే చాలు.అదే మహాభాగ్యం.ఎంక్వయిరీ అధికారికి ఫలానా తేదీ లోపల విచారణ పూర్తి చేయాలని ఆదేశాలలో ఉన్నా అతను ఎంక్వయిరీ సకాలంలో మొదలుపెట్టకపోతే ఎప్పటికీ పనిపూర్తవుతుంది?స్పందన కార్యక్రమం రాష్ట్రప్రధాన కార్యాలయాల్లో,సచివాలయంలో  కూడా జరపాలి.జిల్లాకార్యాలయాలలో పనులు జరగని ప్రజలు రాజధానిలో మాత్రమే  పనులు కావలసినవాళ్ళు అర్జీలు  పెట్టుకుంటారు.ఎందుకంటే కొన్ని అర్జీల పరిష్కారానికి డైరెక్టర్లు,కమీషనర్లు,శాఖాధిపతులు ఆయా దీర్ఘకాలిక పెండింగ్ కేసులపై  దృష్టి పెట్టి  మార్గదర్శనం చెయ్యాలి.పెండింగ్ సమస్యల పరిపూర్తి పై శాఖాధిపతులు నిరంతర సమీక్షలు జరపాలి. ఆలస్యానికి కారకులైన అధికారులపై జరిమానా విధించే పద్ధతి రావాలి.నీతిగా పనిచేసే అధికారులను ప్రజలు మర్యాదగా కాపాడుకుంటారు.లంచం అడిగితే అధికారికి విలువ ఉండదు.అందుకే కొంతమంది అధికారులు మాకు లంచం ఇవ్వొద్దు ప్లీజ్ అని ఫ్లెక్సీలు తగిలించుకున్నారు.

నూర్ బాషా రహంతుల్లా 

విశ్రాంత స్పెషల్ గ్రేడ్ డిప్యూటీ కలక్టర్ 6301493266