యుద్ధాలు వద్దు -ప్రాణదాతలే ముద్దు

యుద్ధాలు వద్దు -ప్రాణదాతలే ముద్దు(సూర్య 5.7.2020)

యుద్ధం అంటే నరబలే.యుద్ధాలకు , ఉగ్రవాదులకు నిలయాలైన పాకిస్తాన్,ఆఫ్ఘనిస్తాన్,ఇరాక్,సిరియా లాంటిదేశాలు నాశనమైపోయాయి.ప్రభుత్వాల కన్నా ప్రజాభిప్రాయం బలమైనది.ప్రజలు ఎప్పుడు యుద్ధాన్ని కోరుకోరు.మహాభారత యుద్ధం చేసిన వాళ్ళుకూడా యుద్ధమంటే అసహ్యించుకున్నారు.పల్నాటి యుద్ధంచేసిన బ్రహ్మనాయుడు. కళింగ యుద్ధం చేసిన అశోకుడు యుద్ధాన్ని ప్రారంభించడానికి ముందు తమలో ఉన్న కోపం, ద్వేషం,వదిలి విరాగులుగా మారిపోయారు.పీనుగులతో నిండిన యుద్ధభూమిని ఏలుకోవటానికి ఇష్టపడలేదు. యుద్ధం ఏ సమస్యను పరిష్కరించదు. యుద్ధానికి చర్చలే పరిష్కారం.యుద్ధం దేనికీ పరిష్కారం కాదు. మహాత్మాగాంధీ లాంటి పెద్దలెందరో యుద్ధం వద్దన్నారు.చివరికి యుద్ధంలోని సైనికుడు కూడా యుద్ధాన్ని ఎట్లా ఆపాలో ఆలోచించాలని కోరారు. లడక్ వెళ్ళిన మోడీ ధైర్యవంతులే శాంతిని కోరుకుంటారని అన్నారు.ఐక్యరాజ్యసమితికి యుద్దాలు ఆపే శక్తి లేదు. శోచనీయ పరిస్థితి.

ఇప్పటికి రెండు ప్రపంచ యుద్ధాలు జరిగాయి. ఆటంబాంబు దాడికి గురైన జపాన్,వియత్నాం దేశాల దురవస్థలను,బాంబువేసిన అమెరికా దుర్మార్గాన్ని నేటికీ తలుచుకొని బాధపడుతూ ఉంటాం.మళ్ళీ ప్రపంచయుద్ధం వస్తే భస్మీపటలమే అనుకునే రోజుల్లో కరోనా వచ్చిపడింది.ప్రపంచంలో 5.21 లక్షలమంది చనిపోతే,అమెరికాలోనే 131 వేల మంది చనిపోయారు.ఇండియాలో కూడా 17 వేలమంది చనిపోయారు.చైనాలో సరైన సంఖ్య తెలియదు కానీ కొన్ని వేల మంది అక్కడే మొదట చనిపోయారు.అసలు కరోనాతో పాటు జి4 వైరస్ కూడా అక్కడే పుట్టుకొస్తోందని విమర్శలు వస్తున్నాయి.చైనా సరుకులు ఏమీ కొనొద్దని వాణిజ్య యుద్ధం చైనా యాప్ ల నిషేధంతో మొదలుపెట్టారు.మానవాళికి మహా శత్రువులు దోమలు.మలేరియా లాంటి రకరకాల రోగాలకు కారణమైన దోమలను చంపే తేలికైన ఆయుధాలు దోమల బ్యాట్లు కూడా చైనా నుండే కోనాల్సివస్తోంది.పేద దేశానికి అన్నము కావాలి కానీ యుద్ధవిమానాలు ఎందుకు?యుద్ధప్రాతిపాధికన దోమలబ్యాట్లు ఇండియాలోనే తయారు చేయించండి అని ప్రజలు కోరుతున్నారు.ఆయుధాలు అమ్ముకునే దేశాలు ఇండియాకు దోమల మందులు ఇవ్వాలని కోరుతున్నారు. వలసకూలీలకు రైళ్లు కూడా ఇవ్వకుండా వందల కిలోమీటర్లు నడిపించారు.నవంబర్ దాకా ఉచిత రేషన్ ధాన్యాలు ఇవ్వటమే గొప్ప పని అయ్యింది.అమెరికాలో ఎప్పుడూ యుద్ధాలనే కోరుకునే ఆయుధవ్యాపారి ట్రంప్ మాదిరిగానే రష్యా కూడా ఉంది.యుద్ధాలు చేసుకునే దేశాలమధ్య మధ్యవర్తిత్వం పేరుతో దూరటం ఆయుధాలు అమ్మటం ఎన్నో ఏళ్లుగా నడిచింది. మాకు ఎవరి జోక్యం అక్కర్లేదని తేల్చి చెప్పినా గొర్రెలకు తోడేలు కాపలాలాగా ఉంటాననటం యుద్ధాలకు తెగబడే దేశాలు ఆలోచించుకోవాలి.ఇప్పటికే మీ దగ్గర కొన్న ఆయుధాలు చాలులేఅంటే తన వద్ద నిల్వ ఉన్న ఆయుధాలను అమ్ముతానంటారు. ప్రపంచంలో ఆయుధాల కొనుగోళ్ళలో మనది రెండవ స్థానం. చైనాతో యుద్ధం జరిగితే అమెరికా,రష్యా తమ ఆయుధాలు అమ్మాలని చూస్తున్నాయి.కోర్టులో ఓడిపోయినవాడు అక్కడే ఎడిస్తే,గెలిచినవాడు ఇంటికొచ్చి లెక్కలు వేసుకున్నాక ఎదుస్తాడట.యుద్ధ విమానాల కొనుగోలుకోసం 39 వేల కోట్ల రూపాయలు కేటాయించారు.స్వదేశీ సరుకు కొనడానికి ప్రజల్ని ముందుకురమ్మంటున్నారు.రహదారులు రైల్వేల నిర్మాణాల చైనా కాంట్రాక్టులు రద్దుచేశారు.యుద్ధంలో ఇరుదేశాలకూ నష్టమే.సైనికులభార్యలు,పిల్లలు అనాధలు అవుతారు.ఎన్నిశౌర్యపతకాలు వచ్చినా అమరుల కుటుంబాలలో చెప్పుకోలేని బాధ.

రెడ్ క్రాస్ వ్యవస్థాపకుడు మానవప్రాణాలే ముఖ్యమంటూ ముస్లిం దేశాలలో ఆ సంస్థ పేరు రెడ్ క్రీసెంట్ గా మార్చి మరీ తన ప్రాణదాన కార్యక్రమాన్ని కొనసాగించాడు.యుద్ధాలు ఏ దేశాలమధ్య జరిగినా అక్కడికి ఆ సంస్థ వెళ్లింది.గాయపడ్డ సైనికుల్ని మందులిచ్చి వైద్యం చేసి ఆదుకోంది.పెన్సిల్లిన్,టెట్రాసైక్లిన్ లాంటి మందులు ప్రాణాధార మందుల్ని కనుగొని వైద్యులు మానవసేవ చేస్తూనే ఉన్నారు.యుద్ధాన్ని ఆపి ఇలాంటి ప్రాణదాతలను వ్యాక్సిన్ శాస్త్రవేత్తలను ప్రభుత్వం ప్రోత్సహించాలి.అప్పుడే ప్రజలకు శాంతి సౌఖ్యం.

ఆరోగ్యంగా ఉన్న పౌరులే దేశానికి నిజమైన సంపద. ప్రజల ఆరోగ్యంతోటే సుఖము సంతోషము. యుద్ధాలకంటే ప్రాణదానం చేసే ప్రతిపనీ మంచిదే.అది ప్రభుత్వపరంగా జరిగినప్పుడు మెచ్చుకోకతప్పదు.130 కోట్ల జనాభా ఉన్న మన దేశానికి 12 లక్షల మంది డాక్టర్లు మాత్రమే అదీ ఎక్కువమంది మహా నగరాల్లో, పట్టణాల్లో స్థిరపడిపోయారు. వైద్యులు,ఆసుపత్రుల పరంగా మనం చాల వెనుకబడి ఉన్నాం.పల్లెటూళ్ళ ప్రజలు వైద్యం కావాలంటే ఒక మోస్తరు టౌనుకు రావలసిందే.ఇలాంటి దశలో 1.7.2020 న ఒకే రోజు మొత్తం 1088 అంబులెన్సులు విజయవాడనుండి జిల్లాలకు ‘కుయ్‌...కుయ్‌’మంటూ వెళ్లాయి.108,104 వాహనాలను ప్రతిమండలానికి ఒకటి చొప్పున ఏర్పాటు చేశారు. వీటి ద్వారా పేదలకు వైద్య అత్యవసర సేవలు అందుతాయి.ప్రైవేటు వైద్యం చాలా ఖరీదు.అందరూ భరించలేరు.ఆరోగ్యసేవలకు కూడా ప్రభుత్వ ఆసుపత్రులలో యూజర్ ఛార్జీలు వసూలు చేసిన గతం మనది. మంగళగిరిలో సూపర్ స్పెషాలిటీ ఆసుపత్రి పెడతామంటే పక్కనే ఉన్న విజవాడలోనే పెట్టాలని అడ్డుకొన్న నాయకులకు రెండుచోట్లా పెడదామని ఆనాడు రాజశేఖరరెడ్డి హితవు చెప్పారు.ఇప్పుడు మంగళగిరిలో జాతీయస్థాయి ప్రభుత్వాసుపత్రీ ఏర్పడింది.క్రమంగా ప్రభుత్వ ఆసుపత్రులను మెరుగు పరచాలి. అంబులెన్సు సర్వీసుల గురించి చెప్పనవసరం లేదు. మన్యంలో పల్లెలకు అంబులెన్సులు పోలేక ఈనాటికీ డోలీలు కావడులే గతి.ఇప్పుడు ఈ అంబులెన్సుల రాకతో రాష్ట్రంలో ప్రతి 75 వేల మందికి ఒక అంబులెన్సు ఉంటుంది. రోగులను,ప్రమాద బాధితులను ఆసుపత్రులకు చేర్చటానికి అరగంటలో అంబులెన్సు వస్తుంది. ప్రాణాపాయస్థితినుంచి కాపాడటానికి కావలసిన అత్యా ధునిక ఉపకరణాలు అంబులెన్సుల్లో ఏర్పాటు చేశారు.అయితే వీటిని ప్రజలకోసం సరిగా నడిపి వైద్యసేవలు అందించే వారిపై ఈ పధకం విజయం ఆధారపడి ఉంటుంది.యుద్ధాలు ప్రాణాలు తీస్త్తుంటే డాక్టర్లు ప్రాణాలు పోస్తున్నారు.మనం డాక్టర్ల పక్షానే ఉందాం.

--నూర్ బాషా రహంతుల్లా, విశ్రాంత స్పెషల్ గ్రేడ్ డిప్యూటీ కలక్టర్,6301493266

దేహమేరా దేవాలయం! జీవుడే సనాతన దైవం!

దేహమేరా దేవాలయం! జీవుడే సనాతన దైవం!

1986 లో వచ్చిన మెదడు వాపు వ్యాధికూడా కరోనా లాగే జనాన్ని కలవరపెట్టింది. ఆనాడు ఆ విచిత్ర వైరసు పందులలో పెరిగి దోమల ద్వారా వ్యాపిస్తున్నట్లు వైద్యులు విన్నవిస్తే వైరస్ కు కారకములైన వరాహములను దోమలను వధించండి అని అప్పటి ముఖ్యమంత్రి ఎన్టీఆర్ అధికారులను ఆజ్నాపించాడు. దోమల్ని నిర్మూలించటం తమ తరంకాదని అందరూ పందులమీదపడి వేటాదారు.అప్పట్లో ఎరుకల వాళ్ళ సంఘం హైకోర్టుకువెళ్లి పందుల్ని కాపాడుకొంది.కొన్నిచోట్ల ఆలయాల్లో మూలవిరాట్టులకు భక్తజనులు ఉన్నిబట్టలు, చలికోట్లు, టోపీలు అలంకరించారు. ‘ఈశ్వరుడే సత్యం ,సత్యమే ఈశ్వరుడు’ అనే భక్తుల విశ్వాసాల నుండి సగుణారాధన ,నిర్గుణోపాసన పుట్టాయి. ప్రార్థనల కోసం దేవాలయాలు , పూజల కోసం, దేవతా విగ్రహాలను ప్రతిష్టించారు. దేవుడంటే ఒక నమ్మకం, ఒక మానసిక స్థైర్యం. గుడి,చర్చి, మసీదు అని పిలిచే పేరులో మార్పు తప్ప...భావం ఒక్కటే. దేవాలయానికి వెళ్లడమంటే ప్రాపంచిక విషయాలను పక్కనబెట్టి నిర్మలమైన హృదయంతో దేవుని ముందు తనను తాను ఆవిష్కరించుకోవడం. కరోనా ప్రభావంతో మూతబడిన దేవాలయాలు చాలా వరకు తెరుచుకున్నాయి. భక్తులంతా మాస్క్‌లు ధరించి.. భౌతిక దూరం పాటిస్తూ దైవ దర్శనం చేసుకుంటున్నారు. 4.5 లక్షల మందిని చంపిన కరోనాను మహమ్మారి అని కొందరు , కరోనా దేవత అని కొందరు పూజలు చేస్తున్నారు. అయితే దైవ దర్శనానికి వెళ్లిన వారిని కూడా కరోనా వదలడంలేదు. మనిషి పుట్టినప్పటినుండి కోట్లాది జీవకణాలను తయారుచేసిన దేహం ముసలితనంలో ఆగిపోతుంది.ఇక్కడ ఆగితేనే మరోకచోట పుట్టటం సాధ్యం కాబట్టి మరణమే పునర్జన్మకు సోపానమని కొందరు ఆధ్యాత్మిక వాదులు అంటారు.చావబోయేవాళ్లు చనిపోయిన వానికోసం ఏడుస్తున్నారు ,ఎవరి చావుకూ బాధపడకూడదని శంకరాచార్య సలహా ఇచ్ఛాదట..కానీ మామూలు మనిషికి అంత తెలివి ఎక్కడిది?దుఖిస్తూనే ఉంటాడు.

జగన్నాధుడికి జ్వరమొస్తే దశమూలికా వైద్యం చేశారట.మక్కా ,జెరూసలేము ,కాశీ, అయోధ్య ,తిరుపతి లాంటి అన్నీ ప్రాంతాలను కరోనా వైరస్‌ కమ్మేసింది. లక్నో లోని దేవాలయంలో దేవుడికి కరోనా వైరస్‌ సోకుతుందనే భయంతో శివలింగానికే మాస్క్‌ వేసేశాడో పూజారి.'చిత్తం శివుడి మీద, మనసు చెప్పుల మీద' అన్నట్టుగా భక్తుల మనసు దేవుడికంటే ఎక్కువ కరోనా మీద ఉంటోంది.గుడిని దేవుడినీ నమ్ముకొని భక్తులు వస్తే భక్తులను నమ్ముకొని ఎంతోమంది వ్యాపారులు బతుకుతూ ఉంటారు.వ్యాపారం నడవాలంటే ప్రజలే భక్తులై రావాలి.దేవుని దర్శనం తర్వాత కాసేపు గుడిలో కూర్చోవాలని చెప్పిన ఆగమ శాస్త్రం కరోనా నయం చేయటం ఎలాగో చెప్పలేదు.వైద్యానికి డాక్టర్లే కావాలి.ఇంతటి దయనీయ స్థితిలో కూడా కొట్లాటలు,తుపాకీ కాల్పులు ఆగలేదు.భారత చైనా దేశాల సైనికులు కొంతమంది చనిపోయారు. యుద్ధం చేసి తలలు తెగవేయగలము , తెగిపోయిన తలలను తిరిగి అతికించగలముగానీ తిరిగి ప్రాణంపోయలేము.ఆస్థాయికి నేటికీ వైద్యవిద్య ఎదగలేదు.యుద్ధం ఇరుదేశాలకు నష్టమే.తిరుపతిలోని గోవిందరాజస్వామి ఆలయంలో పని చేస్తున్న ఓ ఉద్యోగికి, శ్రీకాళహస్తి ఆలయంలో పూజారికి కరోనా సోకింది. గుంపులు గుంపులుగా చేరిన హిందూ ముస్లిం క్రైస్తవులు ఎవరినీ కరోనా వదలటంలేదు. తబ్లిగి వెళ్లొచ్చిన కరోనా ముస్లిముల కంటే మరింత ఎక్కువగా మహమ్మారిలా కరోనా వ్యాపించింది.ట్రంప్ చర్చీలు తెరవాల్సిందే అన్నాడు. ఇక్కడ కూడా దేవాలయాలు, చర్చిలు, మసీదులు తెరవడానికి అనుమతి ఇచ్చారు. దేవుడు వరమిచ్చినా కరోనా వరమివ్వలేదు.దేవుడి తర్వాత దేవుడిగా, దేవుడి ప్రతిరూపాలుగా చెప్పుకునే పూజారులకే కరోనా వచ్చి డాక్టర్లదగ్గరకు వెళుతున్నారు.రెడ్.ఆరంజ్,గ్రీన్ జోన్లు లేవు.అందరూ డేంజర్ జోన్ లోనే ఉన్నారు. చస్తే కరోనా, బతికితే డయేరియా అంటారు. స్కూళ్లు, కాలేజీలు తెరవడానికి కూడా భయపడుతున్న సమయం ఇది. కరోనా వచ్చిన చోట ప్రభుత్వ కార్యాలయాలు కూడా మూస్తున్నారు. ఇళ్లదగ్గరే ఉండి పనిచేయమంటున్నారు.పూర్వంలాగా సినిమా హాళ్ళకు జనం రారు.పిల్లలను ఎక్కువగా కనరు.విదేశాలకు,రాష్ట్రాలకు వలసలు పోరు.అందరికీ ప్రాణ భయం ఏర్పడింది.బలుసాకు తినయినా బతికుంటే చాలు అనుకుంటున్నారు.ఏది ఏమైనా కరోనా కు టీకారావాలి. మందుకనుక్కోవాలి. ఇప్పుడే దేవాలయాలు తెరవడం అనవసరం. భక్తులు భయం భయంగా దేవాలయాలకు వెళ్లకూడదు. కరోనాను తెచ్చుకోకూడదు. అమ్మలారా నాకోసం ఏడ్వకండి , మీకోసం మీబిడ్డలకోసం ఏడవండి అనే ఏసుక్రీస్తు మాటలు అందరికీ గుర్తొస్తున్నాయి. కాదనటానికి లేదు.దేవుడు సర్వాంతర్యామి,సర్వోపగతుడు అని నమ్మితే ఆయన్ని చూడటానికి ఎక్కడికీ వెళ్ళనవసరంలేదు. ఇందుగలడందులేడను సందేహము వలదు ఎందెందు వెదకి చూచిన అందందే గలడు అని ప్రహ్లాదుడు లాగా హృదయంలోనే దర్శించుకోవాలి.దేవాలయాలకు కూడా కరోనా కాలంలో గుంపులుగా వెళ్లకూడదు. కరోనా తగ్గేవరకూ ఆగుదాం.

1985 దేవాలయం సినిమాలో వేటూరి రాసిన పాటలోని మాటలను ఓదార్పుకోసం అదేపనిగా గుర్తుచేసుకుందాం;

శిలా గోపురం ఆలయమా? శఠగోపురమే అర్చనమా?

దేహమేరా దేవాలయం! జీవుడే సనాతన దైవం!

నేనే బ్రహ్మ ,నేనే విష్ణువు, నేనే శివుడై నిలబడితే

ఏ అర్హత నాకుండాలీ? ఏ అధికారం కావాలీ?

అహం బ్రహ్మస్మి అహం బ్రహ్మస్మి

--నూర్ బాషా రహంతుల్లా , విశ్రాంత స్పెషల్ గ్రేడ్ డిప్యూటీ కలక్టర్ ,6301493266

కపట వైఖరి వద్దు

కపట వైఖరి వద్దు (సూర్య 14.6.2020)

గడ్డి తినైనా సరే గండ్ర గొడ్డలి కొని తీరుతానని శపథం చేసిన దుష్టులను నీతి బోధతో ఎవరాపగలరు ? ఖానేకు నహీ ఎల్లీకి బులావ్ అన్నట్లుగా కొన్ని దేశాలు ఆయుధాల సేకరణ కోసం తలకు మించిన బరువును ఎత్తుకుంటున్నాయి. మన దేశం కూడా వేల కోట్ల రూపాయలు రక్షణ రంగానికే వ్యయం చేస్తున్నది. ఈ ఖర్చు మీద ఎలాంటి ఆడిట్ ఉండకపోవటం, రక్షణ ఖర్చులన్నీ రహస్యంగా ఉండటం,భారీగా ముడుపులు ముట్టడం లాంటి ఆశాజనకమయిన విషయాలు రాజకీయ నాయకులకు ఉన్నందువల్ల పొరుగు దేశాన్ని బూచిగా చూపించి, ప్రజల్ని భయపెట్టి, పొరుగు దేశాన్ని తిట్టడం ద్వారా దేశభక్తిని ప్రదర్శించి, ఓట్లు రాబట్టి, తమ పదవులను నిలుపుకొని, ఆదాయం పొందటానికి అతి అనువుగా ఉంది ఈ రక్షణ రంగం.ఆయుధాల తపన ఆగిపోతే మిగిలే డబ్బుతో ఆకలి చావుల్ని ఆపవచ్చు.అడుక్కుతినే వాళ్ళను అరికట్టవచ్చు. అక్షరాస్యతను పెంచవచ్చు. ఇల్లు కట్టించవచ్చు. ఇంకా ఎన్నో చేయవచ్చు. అయితే ఈ అత్యవసరమయిన పనులన్నిటినీ అవతల పెట్టి ఆయుధాలు కొంటున్నారంటే అర్ధం ఏమిటి ? చైనా తన రక్షణ బడ్జెట్‌ను ఇప్పుడు 179 బిలియన్ డాలర్లు చేసిందట.. భారతదేశ రక్షణ కేటాయింపులతో పోలిస్తే ఇది మూడింతలు ఎక్కువట. స్వార్ధమా పరమార్ధమా ? ఎందుకీ ఆయుధ పిచ్చి ?

ఆగ్రరాజ్యాలు అని మనం ముద్దుగా పిలుచుకొనే అన్నలు ఎప్పుడైనా ముఖాముఖీ తలపడ్డారా? పైగా మోహరించిన బలగాలను తొలగించుకుంటూ పరస్పరం సుహృద్భావ పర్యటనలు జరుపుకొంటున్నారు.మధ్యలో పిచ్చిపట్టి తన్నుకుంటున్న వర్ధమాన దేశాలకు బుద్ధిలేనట్లే గదా! తోటివాడు తొడ కోసుకుంటే మనం మెడ కోసుకోవాల్సిందేనంటారు గానీ ఏ దేశంలోనూ విశ్వమానవత వినరాదు.

కోడిని కోసి గోత్రానికంతా పగ అయినట్లుగా పాకిస్తాన్,చైనా,ఉత్తర కొరియా మొదలైన దేశాలు పరిసర దేశాల ఆగ్రహానికి గురి అయ్యాయి.ఒక్కో దేశానికి ఒక్కో కారణం. స్నేహం సజావుగా సాగితేనే స్నేహం. కలిసినప్పుడు కృత్రిమంగా నవ్వుకోవటం, చాటున గోతులు తవ్వుకోవటం. లేకపోతే ఎవరికైనా చెప్పి ఏడ్చుకోవటం, ఇవన్నీ కొంపలు ఆర్పుకునే పద్ధతులే. ఇలాంటి దొంగ స్నేహంకంటే నిర్మొహమాటమయిన ఎడబాటే మేలు. క్రికెట్ అనీ, సార్క్ అనీ పాకిస్తాన్ ను దగ్గరకు చేర్చుకునే ప్రయత్నాలు అనుభవం మీద మానేశారు. చైనా చేపట్టిన 'బెల్ట్‌ అండ్‌ రోడ్డు ఇనీషియేటివ్‌'లో ఇండియా చేరలేదు. భారత–చైనాల మధ్య వాస్తవాధీన రేఖ వివాదాస్పద సరిహద్దులనుంచి ఇరు దేశాల సైన్యాలూ 2 కిలోమీటర్లు వెనక్కు వెళ్లాయట. మన దేశం అమెరికాతో సన్నిహితం కావడం చైనాకు నచ్చడం లేదు. ఇండో–పసిఫిక్‌ ప్రాంతంలో తన ప్రయోజనాలను దెబ్బతీసేలా అమెరికా పావులు కదుపుతోందని, అందులో భారత్‌ భాగస్వామిగా మారుతోందని చైనా ఆందోళన. ఈ సరిహద్దు వివాదం 1962లో యుద్ధానికి దారి తీసింది. బ్రిటిష్‌వారు గీచిన మెక్‌మోహన్‌ రేఖను తాము ఎలా గుర్తిస్తామని చైనా వాదిస్తుంటే, వాస్తవాధీన రేఖ అస్పష్టంగా ఉందని భారత్‌ వాదిస్తున్నది. ఏ దేశంపై ఏ దేశానికీ నమ్మకంలేదు.రెండు దేశాల మధ్య తగాదాను ఆసరా చేసుకుని వాటిమధ్య తల దూర్చటం ఇద్దరికీ ఆయుధాలు అమ్మటం అమెరికా ఎత్తుగడ..డొనాల్డ్‌ ట్రంప్‌ దీనిలో మధ్యవర్తిత్వం వహిస్థానంటే భారత్‌, చైనా రెండూ వద్దన్నాయి.అన్ని దేశాలపై ఆయుధాల ఖర్చు తగ్గాలి. ప్రపంచంలోనే రెండు అతి పెద్ద జనాభా దేశాలు చైనా ఇండియా.దేశాలమధ్య మైత్రి సరుకులపై సుంకాలను తగ్గించి ప్రపంచ వ్యాపారాన్ని పెంచుతుంది. భారత్‌, చైనా మధ్య మైత్రీబంధం బలోపేతం కావడం ఇరు దేశాలకు ఉపయోగకరం. పరస్పర స్నేహము,ఇరుదేశాలకు మేలు.

---నూర్ బాషా రహంతుల్లా ,విశ్రాంత స్పెషల్ గ్రేడ్ డిప్యూటీ కలక్టర్ 6301493266

సమభావం, సమధర్మం సహజీవనమనివార్యం

సమభావం, సమధర్మం సహజీవనమనివార్యం

(సూర్య లో నా సంపాదకీయం 9.6.2020)

 

నరజాతి చరిత్ర సమస్తం పరపీడన పరాయణత్వం అని శ్రీశ్రీ పెదవివిరిచాడు. కాకి చనిపోతే కాకులన్నీ గుంపుగా చేరి గోల చేస్తాయి. మానవత్వం ఉన్న మనుషులు కూడా అంతే. అలెక్స్ హేలీ రాసిన రూట్స్ ఏడుతరాలు అనే తెలుగు నవలగా వచ్చింది.తెల్లవాళ్లు అమెరికా నుంచి ఆఫ్రికా వచ్చి నల్లవాళ్లను బానిసలుగా పట్టికెళ్లటం కొన్నితరాలపాటు నల్లవాళ్లు బానిసలగానే అమెరికాలో బ్రతకటం చదివితే దుఖం వస్తుంది.అమెరికాలో బానిసత్వాన్ని భరించలేక తిరగబడి పారిపోయి వచ్చిన బానిసలను వెతికి పట్టుకొని మళ్లీ బానిసత్వం లోకి పంపించడానికి 1700 సంవత్సరాల్లో బానిస గస్తీ దళాలు ప్రారంభమయ్యాయి.1868లో బ్లాక్‌ కోడ్స్‌ను పూర్తిగా రద్దు చేసి నల్ల జాతీయులకు కూడా సమాన హక్కులు కల్పించారు. అంతర్జాతీయంగా జాతి వివక్షపట్ల నిరసన వ్యక్తం చేసి సమానత్వం కావాలన్నారు మేధావులు. విధికి లోబడి తనకు తెలియకుండానే మనిషి చెడ్డ పనికి పూనుకొంటాడని భగవద్గీత 18:60 వ శ్లోకం చెబుతోందట. అర్జునుడు తన ఇష్టము లేకనే అస్వతంత్రముగ యుద్ధము చేశాడట.జనమేజయుడు తనకు ఇష్టంలేకపోయినా మాయ ప్రభావంతో బ్రాహ్మణ సాధువు తల నరికాడట.1968లో నల్లజాతీయుడు డాక్టర్‌ మార్టిన్‌ లూథర్‌ కింగ్‌ ను హత్య చేశారు. ఇప్పుడు ఫ్లాయిడ్‌ను హత్య చేశాడొక అమెరికన్ పోలీస్‌. ఎవరు ఏమిచేసినా పోయిన ప్రాణం తిరిగిరాదు.చంపకుండానే ఉండాలి. చంపదగినయట్టి శత్రువు తనచేత జిక్కెనేని పొసగమేలుచేసి పొమ్మనుటే చాలు అన్న వేమన సూత్రాన్ని ఈ లోకంలో ఎంతమంది పాటిస్తారు?ఫ్లాయిడ్ ప్రాణం తీసేంతగా చేసిన తప్పు ఏమిటి? అని నల్లవారు అడుగుతున్నారు . విభజించు పాలించు సిద్ధాంతాన్ని అమలు చేసిన వాళ్ళంతా ఫలితంగా తిరుగుబాటును చూశారు. డొనాల్డ్‌ ట్రంప్‌ బంకర్‌లో దాక్కోవలసి వచ్చింది. సైన్యాన్ని ప్రయోగిస్తాడట. ఇదికూడా విధి రాతయేనా? దేశాధిపతి అయినా జనాగ్రహం ముందు దుర్బలుడే. నిరసనకారులంతా దొంగలని, నిరసనకారులు వైట్‌హౌస్‌లోకి వచ్చినట్లయితే వారిపైన క్రూరమైన కుక్కలు దాడిచేసేవని, అలాగే సీక్రెట్‌ సర్వీస్‌ భద్రతా దళాలు ఆయుధాలను ప్రయోగించేవారని లూటీలు కొనసాగితే కాల్చిచంపుతామని ట్రంప్ అన్నారు. సహనంతో కలిసి బ్రతకాలనే సాధు శాస్త్రాలు మూగబోయాయి. కులము,మతము,రంగును బట్టి వివక్ష చూపేది మానవత్వాన్ని మంటగలిపే నీచ సంస్కృతివద్దు అని పెద్దలు గతంలో ఎంత చెప్పినా రెండు ప్రపంచయుద్ధాలు జరిగాయి.అసలు యుద్ధం జరగని దేశమంటూ ప్రపంచంలో లేదేమో! పేరు ధర్మరాజు అని పేరుగాంచిన పెద్ద మనుషులు కూడా సహనభావం లోపించి కయ్యాలు తెచ్చుకుంటున్నారు. యుద్ధకాంక్షతో రగిలిపోయే వీరులలో యుద్ధ ఆవేశాన్ని తగ్గించి పూర్వం సుందరాంగులు తమ అందచందాలతోశాంతి సహన భావాలను మేల్కొలిపేవారట.ఇప్పుడు ఆ శ్రుంగార భావనలు,విషకన్యలు ఉపయోగించటం లేదు.పట్టరానికోపం,అహంకార ఆధిపత్య ధోరణులు, వివక్ష,ఏదో ఒక సాకుతో రగిలిపోవటం , ప్రతిఘటన కొన సాగిస్తున్నారు.అమెరికా,ఆఫ్రికా, అరేబియా.ఖండాల దేశాలలో అసహనం ఇలా ఉంటే , మనదేశంలో కుల వివక్ష ,అంటరానితనం దుర్మార్గంగా కొనసాగిన రోజులున్నాయి. ఈ కరోనా అందరినీ అంటరానివాళ్లను చేసింది. అయినా ఈ దుర్మార్గాలు ఇంకా దేశాన్ని పూర్తిగా వదలలేదని అడపాదడపా వార్తలు వస్తున్నాయి.కొన్ని చోట్ల దేవాలయాలలోకి రానివ్వలేదని బాధపడుతున్నారు.కొన్నిచోట్ల కులాంతర వివాహితుల్ని చంపారు. కొన్నిచోట్ల చెరువునీళ్లు తీసుకొనివ్వకపోవటం లాంటి దౌర్జన్యాలు జరిగాయి.సోషల్ మీడియాలో ఈ కదనాలు వస్తూనే ఉన్నాయి.

లౌకికవాదం,సమసమాజ స్థాపన కోరిన భారత రాజ్యాంగ నిర్మాత అంబేద్కర్ తానే స్వయంగా అస్పృశ్యత వివక్షలను ఎదుర్కొన్న బాధితుడు.చివరికి బౌద్ధాన్ని స్వీకరించాడు. ఇతర రాష్ట్రాలలో ఎంతోమంది మహనీయులు కుల మత వివక్షలను పోగొట్టటానికి ఎన్నో నవలల్లో, సినిమాల్లో దుయ్యబట్టి హితబోధ చేశారు. తెలుగునాట మన రచయితలు,మహానుభావులు గొప్ప సందేశాలను ప్రజలకు అందించారు. అల్లకల్లోల సమయంలో వాటిని ఒకసారి మనమూ గుర్తుతెచ్చుకుందాం: “మంచి చెడ్డలు లోకమందున ఎంచి చూడగ రెండే కులములు / మంచి అన్నది మాల అయితే మాల నేనౌతాను” అన్నాడు గురజాడ. “జాతిబేధము కలుగదు నీతికెందు:పాపపుణ్య విబేధ భావమున పొసగు:ధర్మశీలురు నిర్దయాత్మకులు ననడు:రెండే జాతులు మరి వేరొకండు లేదు”.(1937 బాల యోగిని) “మాలలు మాత్రం మనుజులు కారా? మనుజుల విభజనమేలా?” (1938 మాలపిల్ల) "జాతి బేధం సమసిపోదా జనులు సుఖమందా?నీతిలేని పాడు సంఘం నిజము కనుగొనదా?సాటివారి సమత చూచే కాలమేరాదా ?నీవనీ నేననీ బేధమే విడనాడదా ? (1954 సంఘం - తోలేటి) “చిదంబరములో శివుని దర్శనం చేయగరాదనే పూజారి/అంతట శివుడే అతనిని బ్రోచి పరంజ్యోతిగా వెలయించే “ (1958 జయభేరి - శ్రీశ్రీ) "అంటరానితనము – ఒంటరితనము,/అనాదిగా మీ జాతికి అదే మూలధనము,ఇక సమభావం, సమధర్మం సహజీవన మనివార్యం,తెలుసుకొనుట మీధర్మం"(1972 మంచి రోజులు వచ్చాయి -దేవులపల్లి కృష్ణ శాస్త్రి) “బానిసభావం విడనాడి ,ఏజాతి నిలుచునో అది జాతి” (1973 గాంధీ పుట్టినదేశం - మల్లవరపు గోపి).

మీరూ ఇలాంటి పాటల చరణాలను ఎన్నో చెబుతారు. ఒక్క సినిమా రంగంలోనే జ్నానము తెలిసిన తెలుగు పెద్దలు ఇన్నివిధాలుగా వాపోయారు,ఇప్పటికీ వాపోతూనే ఉన్నారు. మనదీ పెద్ద చరిత్రే. దేశంలో ఎన్నోచోట్ల కులహత్యలు ,అణచివేతల వార్తలు ఈనాటికీ వస్తున్నాయి.దేశ సంపద సృష్టికర్తలైన కూలీలకు వందనాలు ఆర్పిద్దాం. ప్రపంచంలో వివిధ జాతులు కులాలు మతాల మనుషులు మర్యాదగా గౌరవంగా సురక్షితంగా బ్రతకాలి. కాబట్టి మనుషులంతా కలిసే బ్రతకాలి. మానవజాతుల మధ్య సమభావం,సమధర్మం,సహజీవనం తప్పదు.

--నూర్ బాషా రహంతుల్లా ,విశ్రాంత స్పెషల్ గ్రేడ్ డిప్యూటీ కలక్టర్,6301493266

ఎన్ని కష్టాలురా దేవుడా ?

ఎన్ని కష్టాలురా దేవుడా ? (సూర్య 31.5,2020)

దేశవ్యాప్తంగా అనేక ప్రాంతాల్లో ఉష్ణోగ్రతలు 50 డిగ్రీలను తాకాయి.మనదేశంలో వడదెబ్బతో ఏటా ఐదారువేల మంది మరణిస్తూ ఉంటారు. ఇప్పుడైనా వడగాడ్పులను ప్రకృతి వైపరీత్యంగా గుర్తించాలి. వడగాడ్పులకు కొన్ని రాష్ట్రాలలో రాకాసి మిడతలు లక్షలాది ఎకరాల్లో పంటను నాశనం చేస్తున్నాయి. అగ్నిమాపక యంత్రాలతో డ్రోన్లతో మందులు పిచికారీ చేయిస్తున్నారు.కొన్నిచోట్ల పొలాలలో బాతుల గుంపులు మిడతలను కొంతవరకు నివారిస్తున్నాయట. భారత స్వావలంబనలో బాతులపెంపకందారులను కూడా ప్రోత్సహించాలి.

ఔరంగాబాద్ రైలుపట్టాలపై పడుకొని చనిపోయిన కూలీలు, ముజఫర్‌పూర్‌ రైల్వే స్టేషన్‌ ప్లాట్‌ఫామ్‌పై వడగాలికి చనిపోయిన ్లి,బిడ్డల మరణ దృశ్యాలు ప్రజల్ని కంటతడి పెట్టించాయి.వేలాదిమైళ్ల దూరం నడుచుకుంటూ స్వస్థలాలకు వెళుతున్న అసంఖ్యాక కార్మికులు ఆకలిదప్పులకు గురవుతూనే నడచుకుంటూ పోతున్న పిల్లలు, మహిళలు రహదారులపై, అడవుల్లో, రైల్వే ట్రాక్‌లమీదే పడి కుప్పకూలిపోతున్నారు. ఆత్మనిర్భర భారత్‌లో రహదారులన్నీ వలసకూలీల పాదాలతో రక్తమోడుతున్నాయి. కరోనా బారినపడి వలసకూలీల్లో చాలామంది చనిపోతున్నారు. ప్రైవేట్‌ ఆరోగ్య వ్యవస్థ పూర్తిగా మూతపడిపోయింది. ప్రభుత్వ ఆసుపత్రుల్లో మాత్రమే వైద్యం పొందాలి. ఎన్నో స్వచ్ఛంద సంస్థలు,రంగంలోకి దిగి చేతనైనంత సాయం చేస్తున్నారు.

ఇకమీదట ఉత్తరప్రదేశ్‌ కూలీలకోసం ఆరాష్ట్ర వలసల కమిషన్‌ ను అభ్యర్దించాలి.కార్మికులను కావాలని అడిగిన రాష్ట్రం, ఆ కార్మికుల సంక్షేమానికి, వారి సామాజిక భద్ర తకు ఎలాంటి చర్యలు తీసుకోదల్చుకున్నదో కమిషన్‌కు చెప్పాలట. బీమా సదుపాయం కల్పిస్తామని హామీ ఇవ్వాలట. అమలుజరిపితే ఈ నియమాలు మంచివే. ఎందుకంటే మనకోసం మాల్స్, మల్టీప్లెక్స్‌లు, అపార్ట్‌మెంట్లు, హోటళ్లు, ఆసుపత్రులు, ఫ్యాక్టరీలు కట్టిన శ్రామికులకు మేలు జరగాలి.

అసంఘటిత రంగంలో ఉన్న కూలీలకు పెద్ద పెద్ద కోర్కెలు తీరవు.పుట్టినచోటే ఏదో ఒక పని దొరికితే చాలు.వలస కూలీలుగా కన్నవారిని విడిచి, భార్యాబిడ్డల్ని వదిలి వేల కిలోమీటర్ల దూరం దాటి రావల్సిన అవసరం వీరికి వుండదు. పేదరిక నిర్మూలన పథకాలు ఎన్ని వున్నా ఉపయోగపడ లేదు. వలస జీవులతో పనులు చేయించుకుంటున్న యజమానులు కార్మికులకు న్యాయంగా దక్కవలసినవి దక్కనివ్వాలి.గ్రామాలకు చేరుతున్న వారికి ఉపాధి హామీ చట్టం కింద పనులు కలిపించడానికి రాష్ట్రాలన్నీ ముందుకు రావాలి.అజీమ్‌ ప్రేమ్‌జీ విశ్వవిద్యాలయం నిర్వహించిన సర్వేలో పట్టణ కార్మికుల్లో 80 శాతంఅంటే 9.3 కోట్ల మంది లాక్‌డౌన్‌ సమయంలో ఉపాధిని కోల్పోయినట్టు తేలింది. నగరాలు, పట్టణాల్లో మిగిలిపోయిన అసంఘటిత రంగంలోని అసంఖ్యాక కార్మికులకు పనులు కల్పించాలి. కార్పొరేట్‌ విద్యా సంస్థలు తమదగ్గర పనిచేసిన ఉద్యోగులకు జీతాలివ్వాలి.కార్డుల్లేని వారికి రేషన్‌ కార్డులు ఇవ్వాలీ.

ఎండాకాలంలో అందరికీ నీడనిచ్చే చెట్లు కావాలి , నీళ్ళకోసం చెరువులు , బావులుకావాలి.నీరు నీడ కల్పించే పనుల్ని తిరిగి గ్రామాలు చేరుకున్న కూలీలకు ఉపాధి హామీ పధకంలో పనులు కల్పించాలి.ఇక వేరే ఊళ్ళకు వలస పోకుండా సొంత రాష్ట్రాలలోనే పనులు దొరికేలా పరిశ్రమలు నెలకొల్పాలని పారిశ్రామిక వేత్తలను కోరాలి.స్వయం ఉపాధి భారీ ఎత్తున విస్తరించాలి .అడవులను నరకడం ఆపాలి. విషపూరిత రసాయనాలు, వాయువులను వెదజల్లే పరిశ్రమలను జల్లెడపట్టాలి. లాక్ డౌన్ వల్ల ఇలాంటి విషపరిశ్రమలు మూతపడి గంగ ,యమున లాంటి నదులు శుభ్రపడ్డాయట.అభివృద్ధి పేరిట పర్యావరణ చట్టాల నిబంధనలను తుంగలో తొక్కి గనుల తవ్వకం జరుపకూడదు.ఏదైనా కొత్త పరిశ్రమ నిర్మాణానికి ముందు స్థానిక ప్రజల మొరవినాలి. అటవీ పర్యావరణ శాఖ జాతీయ సంస్థలు డెహ్రాడూన్‌, ఛండీగఢ్‌ లో వున్నాయి. 19 ప్రాంతీయ కార్యాలయాలు ఆయా అడవులకు సమీపం లోనే వున్నాయి. వాటన్నిటికీ నియంత్రణ శక్తి సామర్ద్యాలను పెంచాలి.సముద్ర తీర పరిరక్షణ సముద్ర తీరం ఆక్రమణల పరం కాకుండా జరగాలి. తీరం వెంబడి విస్తరించిన మడ అడవులు బ్రతకాలి. మత్స్యకారుల జీవనోపాధికి ముప్పు వస్తే వారు గుజరాత్ లాంటి దూర రాష్ట్రాలకు వలస పోకుండా ప్రత్యామ్నాయ జీవన మార్గాలు కల్పించాలి.కరోనా దెబ్బకు దేశంలో నిరుద్యోగిత 1.2 కోట్లమందితో 24 శాతానికి చేరుకుంది.నాన్‌ బ్యాంకింగ్‌ ఫైనాన్స్‌ సంస్థలు తమ రిజిస్ట్రేషన్‌లు రద్దు చేసుకుంటున్నాయి.గ్రామీణ ఉపాధి కల్పన పథకానికి కేంద్రం రూ. 40,000కోట్లు ప్రకటించటం మంచిపనే.గ్రామాలలో మరింతమంది కార్మికులకు ఉపాధి దొరకడంతోపాటు ఉత్పత్తి చేసిన సరుకులకు డిమాండ్‌ ఏర్పడుతుంది. ఇక్కడ ఉత్పత్తి అయిన సరుకుల వినియోగం పెరగాలంటే ప్రజల కొనుగోలుశక్తి పెరగాలి. కాబట్టి అమెరికా, బ్రిటన్‌ లలో లాగా ఇక్కడా నిరుద్యోగులకు భృతి, నగదు తోడ్పాటు ఇవ్వాలి.

వీటన్నిటికి తోడు అరుణాచలప్రదేశ్ భూభాగం లోకి చైనా సైనికులు దూసుకొచ్చి మన సైనికులతో ఘర్షణకు దిగారట. జనం కరోనాతోనే పెద్ద యుద్ధం చేస్తున్నారు.తమ ప్రాణాలు నిలుపుకుంటానికి శతవిధాలా ప్రయత్నిస్తున్నారు.రోగుల ప్రాణాలను కాపాడటానికి చైనా కూడా టీకా తయారీ ప్రయోగాలలో సఫలం కాబోతోందని వార్తలొస్తున్నాయి. ఆ సంతోషం నిలువకుండానే ఈ యుద్ధవార్తలేమిటి? అంటే ఓర్చుకోవాలి నాయనా! జీవితం అంటేనే వ్యాధులు బాధలు వ్యధలు వేదనలు అన్నాడు ఒకాయన.

ఆత్రేయ గారి పాటలో కూడా ఇలాంటి ప్రశ్నలే గుర్తొచ్చి వేదాంతంలో పడేశాయి :

తలచినదే జరిగినదా దైవం ఎందులకు?/

జరిగినదే తలచితివా శాంతి లేదు నీకు

ముగిసిన గాథ మొదలిడదు దేవుని రచనలలో/మొదలిడు గాథ ముగిసేదెపుడో మనుజుల బ్రతుకులలో

ఎదలో ఒకరే కుదిరిననాడు మనసే ఒక స్వర్గం/ఒకరుండగా వేరొకరొచ్చారా లోకం ఒక నరకం

ఎవరొస్తారో ఎవరుంటారో ఏమౌనో మన కలలు /

ఇది సహజం ఇది సత్యం ఎందులకీ ఖేదం?

---నూర్ బాషా రహంతుల్లా,విశ్రాంత స్పెషల్ గ్రేడ్ డిప్యూటీ కలక్టర్ 6301493266

వలసబాట పట్టిన బాటసారికి ఎంత కష్టం?

వలసబాట పట్టిన బాటసారికి ఎంత కష్టం?

ప్రతి జీవికీ తన సొంత ఊరుతో ఒక అనుబంధం పెనవేసుకొని ఉంటుంది.అది అతనికి జన్మనిచ్చిన భూమి.తన బాల్యమంతా స్నేహితులతో గడిపిన భూమి. తన జీవనోపాధి కోసం ఎన్నో ప్రాంతాలకు వలస వెళ్లినా, ఏ దో నాటికి తన ఊరికే తిరిగి వస్తాడు.తప్పదు.తప్పిపోయిన కుమారుడిది వలస పోయిన చోట ఎంత దయనీయమైన బ్రతుకో బైబిల్ లో ఏసుక్రీస్తు చెబుతాడు.వలస కూలీ కూడా తనకు పనిదొరికిన ఊరు వదిలి వెళ్లాల్సోస్తే బాధపడతాడు.పని దొరకని సొంత ఊరికి తిరిగి వెళదా మంటే దిగులు.పిల్లల పోషణ ఎలాగా అని భయం.ఏమి బతుకు... ఏమి బతుకు... చెడ్డ బతుకు అని పాడుకోని కార్మికులు ఎవరుంటారు? కాలినడకన వందల కిలోమీటర్లు నడుస్తున్న కూలీలు తమ పిల్లలని కూడా నడిపిస్తుంటే మానవత్వం ఉన్న ఎవరికైనా కన్నీళ్లు వస్తున్నాయి.వడదెబ్బ కు కొందరు చనిపోయారు. అంత పేదరికంలో ఉన్న వారు ఎక్కువమంది పిల్లల్ని కని వారిని బాధపెట్టకూడదు అని అంటే వారి ఇష్టం కననివ్వండి ఎంత జనాభా ఉంటే అంత అభివృద్ధి అంటున్నారు కొందరు.గతంలో చంద్రబాబు నాయుడు గారైతే ఎక్కువమంది పిల్లలతో ఫలానా ఫలానా దేశాలు బాగు పడ్డాయి తెలుసుకొని ఎక్కువ మందిని కనండయా అని బుద్ధి చెప్పారు.

పిల్లలంటే అందరీకీ మక్కువే.కానీ పిల్లలు మంచి సౌకర్యాలతో బ్రతికే పరిస్థితులు కల్పించకపోతే తాను కన్న పిల్లలనే చంకనేసుకొని సంచరించాల్సి వస్తుంది. శ్రీశ్రీ చెప్పినట్లు దిగులు పడుతూ, దీనుడౌతూ తిరగాల్సి వస్తుంది.ఆనాడు సిరిగలవానికి చెల్లును/తరుణుల పదియాఱువేల దగ పెండ్లాడ తిరిపెమున కిద్దరాండ్రా?పరమేశా! గంగ విడుము పార్వతి చాలున్ అని దేవుణ్ణి కూడా అడిగిన దేశం మనది.ఆత్రేయ కూడా ఆకలిరాజ్యంలో నిరుద్యోగుల అవస్థలకు చలించి స్వతంత్ర దేశంలో చావుకూడా పెళ్లిలాంటిదే బ్రదర్ అంటాడు.చావును పెళ్ళితో పోలుస్తావా అని ఆత్రేయను విమర్శించలేదు.ఆయన సదుద్దేశాన్ని అర్ధం చేసుకొని ఊరుకున్నారు.పెళ్లిళ్ళకే ఒప్పుకొని వాళ్ళు పిల్లలకు ఒప్పుకుంటారా?ఇప్పుడైతే చిన్న కారణం దొరికితే చాలు నీవు ఇంత అజ్నానివా అని ఉతికి ఆరేస్తున్నారు.అక్కిరాజు ప్రసాద్ లాంటివారు ఇదంతా తలుచుకొని ఏమున్నదక్కో ఏమున్నదక్కా , పిల్ల పాపలకు నేర్పిందేమి లేదు అంటూ బాధపడతారు. ఈ కష్టం గడిచే వరకు పనిదొరికినవారు తోటి వారికి తమ పనిలో భాగం ఇచ్చి తోడ్పడలేరు.ఒకరికొకరు సహాయపడే వాతావరణం కరోనా కల్పించిన కరువులో తగ్గి పోయింది. ఎవరి స్వార్ధము వారిది. వలస కూలీలకు రవాణా సౌకర్యాలు కల్పించటానికే చాలా సమయం పట్టింది. వారి తిరుగు ప్రయాణాలకు డబ్బులు ఎలా అని తర్జన భర్జన పడ్డారు .ఛార్జీలు నువ్వు పెట్టుకోవాలంటే నువ్వే పెట్టుకోవాలని కేంద్రము రాష్ట్రాలూ వాదులాడుకుంటూ కాలం గడిపాయి. వలస కార్మికులు ఆకలి మంటలతో రోడ్ల మీద పడ్డారు. అందరినీ ఇళ్లలో ఉండమన్నారు.వలస కూలీలకు సొంత ఇల్లు ఉండదు.యజమాని కట్టించిన రేకుల షెడ్డులోనే కాపురం. కాని వారి తిండి,కనీస అవసరాల కోసం జనం వీథుల్లోకి వస్తున్నారు. ఇక వలస కష్టాలు వద్దు , దొరికిందే తింటాము , ఊళ్లోనే ఉంటాము ఆని గ్రామానికి బస్సుదొరికి తిరిగివెళుతున్న కుటుంబాలు అంటున్న వార్త చూచి ఈ నిర్భాగ్యుల నిర్ణయం నిలుస్తుందా?అనిపించింది.ఇదికరోనా వైరాగ్యం, ప్రసూతి వైరాగ్యం లాంటి తాత్కాలిక నిట్టూర్పుమాత్రమే అన్నారు కొందరు.అసలు వాళ్ళకు ఉన్నప్రాంతంలోనే ఉపాధి దొరికితే వలసలు ఎందుకు వస్తారు,వీరి కష్టాలకు కన్నీళ్ళకు ఎవరు బాధ్యులు అని కొందరి విశ్లేషణ.సొంత ఇల్లు, భూమిలేని ఈ వలస కూలీలకు ఇల్లు కట్టించి,తలాఒక అరఎకరమన్నా పంచిపెడితే ఊళ్లోనే ఉంటారని మరొకరి సలహా.

వలసకూలీలను తిరిగి పోనివ్వకూడదని వలస రాష్ట్రంలోనే ఆపాలని బిల్డర్లు పారిశ్రామికవేత్తలు ఒత్తిడితెచ్చి కొన్ని శ్రామిక రైళ్లు ఆపేశారట.మేధావులు అందరూ వీళ్ళగురించే బాధపడుతున్నారు. దేశవ్యాప్తంగా ఆవరించిన కూలీల నడక కష్టంలో వారికున్న కొద్దిపాటి ఆర్ధికశక్తి తోనే సహాయము చేసిన దారిపొడుగూ నిలబడిన స్థానిక దాతలందరికీ నమస్కారం.దేశ ప్రజలు దీపాలు వెలిగించారు.పూలు చల్లారు.టపాసులు పేల్చారు.అయినా 4 గంటలు మాత్రమే సమయం ఇచ్చి లాక్‌డౌన్‌ ప్రకటించారు. లాక్‌డౌన్‌ ప్రకటించక ముందే నాలుగురోజులపాటు సొంత ఊళ్ళకు పోవటానికి వీలుగా ప్రజలకు రవాణా సౌకర్యాలు ఇచ్చినట్లైతే బాగుండేది. తల్లీబిడ్డలతో సహా చంకన సంచులు, నెత్తిన గోతాలు పెట్టుకొని వందల వేల మైళ్లు కాలి నడకన హైవే ల మీదుగా చేస్తున్న ప్రయాణాలు చూసిన వారి కళ్లలో నీళ్లొచ్చాయి.మద్యం పున:ప్రవేశంతో పరిస్థితి మరింత దిగజారింది. రోడ్లపై నడిచిన వలస కార్మికులపై కొన్నిచోట్ల లాఠీచార్జి కూడా చేశారు.పైగా ఇక నుండి కరోనాతో సహజీవనం చేయక తప్పదట. రాష్ట్రాలకు ఋణ పరిమితికి షరతులు పెట్టినందుకు కేంద్రాన్ని కేసీఆర్ విమర్శించారు. ఆనాడు కేంద్రం మిథ్య అన్న ఎన్టీఆర్ మాటలు గుర్తుచ్చాయి. భారత ఆర్థిక వ్యవస్ధను గాడిలో పెట్టాలనే ఉద్దేశంతో ప్రకటించిన 'ఆత్మ నిర్భర భారత్‌' రుణాలు నడిచే కూలీలకు ఇవ్వాలి. ఆత్మనిర్భరము డబ్బులు ఇస్తే కలుగుతుంది.రైళ్లు వేయకుండా కూలీలు తమ సామానులు బిడ్డలను ఎత్తుకొని నిబ్బరంగా నడవాలంటే ఎలా నడుస్తారు? చివరికి రోహిణి కార్తె సమయంలో శ్రామిక రైళ్లు వదిలారు.పంటను తడిపేందుకు ఒక మగ్గు నీళ్ళు సరిపోతాయా?వేలమంది కూలీల తరలింపుకు అవతలి రాష్ట్రం కూడా అనుమతీస్తేనే రైలు కదులుతుందట.కూలీల గురించి బాధపడుతూనే ఈ ఆంక్షల పరిమితుల్లో జిల్లా కలక్టర్లు కూడా ఏమీ చేయలేక కొన్నిచోట్ల ఆగిపోయారట.

దేవుడు వలసకూలీలను ఎందుకు చేశాడు? అని అడిగితే ఒకాయన సముద్రాల లెవెల్లో ఈ చరణాన్నే సమాధానంగా పాడాడు:

"వేద శాస్త్రములు చదివినవారే ఎరుగరు సృష్టి విలాసం

అల్పబుద్దితో జ్ఞానదాతనే సలుపకు పరిహాసం …

బ్రతుకంతా పలు ప్రశ్నలమయమై బ్రతుకును జనసముదాయం

బదులు కోసమై వెదకుటమాని బ్రతుకుటయే న్యాయం"

సరేనని మూసుకొని కూర్చున్నాను.

--- నూర్ బాషా రహంతుల్లా,విశ్రాంత స్పెషల్ గ్రేడ్ డిప్యూటీ కలక్టర్ , 6301493266

మద్యంలో మునుగుతున్న సంక్షేమం

మద్యంలో మునుగుతున్న సంక్షేమం ( గీటురాయి 15.5.2020) 

 

కరోనా వల్ల ప్రపంచంలో 3 లక్షల మంది,అమెరికాలో 85 వేలమంది.ఇండియాలో 25 వందల మంది ప్రాణాలు కోల్పోయారు. ప్రపంచవ్యాప్తంగా 16 లక్షలమంది భారత్ లో 25 వేల మంది.ఆంధ్రలో 11 వందలమంది కోలుకున్నారు.వీళ్ళు ప్లాస్మా దాతలుగా పనికివస్తారు. కరోనానివారణకు టీకాలు తయారు చేసే పనిలో ఇండియా తోపాటు అమెరికా ,చైనా.ఇటలీ,ఇజ్రాయెల్,బ్రిటన్ లాంటి చాలాదేశాలు ఉన్నాయి.కానీ వ్యాక్సీన్ తయారీకి మిగతా దేశాలు 61 వేల కోట్లరూపాయలు ఇవ్వదలిస్తే అమెరికా మాత్రం డబ్బులేమీ ఇవ్వను అందట. తాము విజయవంతంగా టీకా పరీక్షించామని ఇటలీ , ఇజ్రాయెల్ చెప్పాయి.

విదేశాల్లో చిక్కుకున్నవారిని స్వదేశానికి తీసుకు రావటం ప్రస్తుత పరిస్థితుల్లో ఎంత మాత్రం సరైనది కాదని, కరోనా లేదని నిర్థారించుకున్నవారిని మాత్రమే ఇలా తేవాలని.ఏ ఒక్కరికి వైరస్‌ ఉన్నా విమానంలో ఉన్న మిగతావారంతా ప్రమాదంలో పడతారని. కేవలం థర్మల్‌ స్క్రీనింగ్‌తో విమానాలు ఎక్కించవద్దని కేరళ ముఖ్యమంత్రి పినరపి విజయన్‌ అంటున్నారు.

లాక్‌డౌన్‌ వలన దేశంలో 45 రోజులుగా ఎక్కడికక్కడ చిక్కుకున్న వలసజీవుల్ని స్వస్థలాలకు తరలించడానికి ఆర్ధిక ఇబ్బందులతో శ్రామిక రైళ్లు నడుపు తున్నారు. లక్షలాదిమంది కూలీలు సొంతూళ్లకు కాలి నడకన వెళ్ళి 70 మంది చనిపోయారు.కొందరైతే సిమెంట్‌ మిక్సర్‌ కంటైనర్ ట్రక్కులు పట్టుకొని బయలుదేరారు.ఔరంగాబాద్ రైలు లో ప్రయాణిస్తున్న వలసకూలీలు చనిపోయినా , స్వస్థలాలకు పోవడానికి అనుమతించమంటూ దాదాపు అన్ని రాష్ట్రాల్లోనూ వలసజీవులు తిరగబడటం మొదలుపెట్టారు.శ్రామిక రైళ్ళలో కూలీల ఛార్జీలు కేంద్రం 85 శాతం రాష్ట్ర ప్రభుత్వాలు 15 శాతం భరించాలట. వలసజీవుల తరలింపు కోసం ఛార్జీలు అడగారు.వలసజీవుల్లో 65 శాతంమంది దగ్గర కనీసం వంద రూపాయలు కూడా లేవట. ప్రధాని నరేంద్ర మోదీతో తమకు ఆర్థిక సాయం అందించాలని ముఖ్యమంత్రులంతా మొర పెట్టుకుంటున్నారు. ఏటిలోని కెరటాలు ఏరు విడిచి పోవు అన్నట్లు వలసజీవులకు సొంత ఊళ్ళకు పోవాలనే దిగులు లాక్ డౌన్ కాలంలో పెరిగిపోయింది. ప్రభుత్వం నగదు వసూలు కేంద్రం మాత్రమే కాదు. వలసకార్మికుల తరలింపు చెయ్యాలికానీ ఎక్కడ వున్నవారు అక్కడే వుండిపోవాలని నిర్దేశించ కూడదు. స్వస్థలాలకు పంపే చార్జీల ఖర్చు కొంత తమపార్టీ భరిస్తుందని సోనియా గాంధీ ముందుకొస్తే కర్ణాటక ముఖ్యమంత్రి యడ్యూరప్ప మరో ఫరో రాజులాగా అడ్డుపడి తమ భవననిర్మాణాల కోసం కూలీలు కావాలని శ్రామిక రైళ్లను ఆపేశారు.

కేంద్రం దగ్గర ప్రస్తుతం 3 కోట్ల 10 లక్షల టన్నుల బియ్యం, 2 కోట్ల 75 లక్షల టన్నుల గోధుమలు నిల్వలు ఉన్నాయి.లాక్డౌన్ కాలంలో కూలీలకు ఇవ్వటానికి ఆహారధాన్యాలను రాష్ట్రాలకు విడుదల చేయటం సంక్షేమ కార్యం. ఒక్క కేరళ రాష్ట్రం మాత్రమే ప్రతి ఇంటికి 19 రకాల ఆహార వస్తువులు 5 వేల రూపాయలు పంపించింది. మోడీ ఆర్థిక ప్యాకేజీ ఏమీ ప్రకటించలేదు. ఈ నిల్వలను మద్యం తయారీకి శానిటైజర్ల రసాయన పరిశ్రమల్లో ఎథనాల్‌ తయారీకి మళ్ళిస్తారట. చమురు ధరలు కారుచౌక గా దొరికే కాలంలో పెట్రోలు డీజిల్‌ కు బదులు ఎథనాల్‌ వాడటం ఎందుకు? ఎథనాల్‌ తయారీ కోసం ఆహారధాన్యాలను మళ్ళించడం అవసరమా? ఐరాస ఆహారధాన్యాలను ఎథనాల్‌ తయారీలో వాడవద్దని, అవి ప్రజల ఆహారం కోసం వినియోగించాలని చెప్పింది.ప్రస్తుతం దేశంలో ఉన్న 50 కోట్ల లీటర్ల ఎథనాల్‌ తో 70 కోట్ల లీటర్ల శానిటైజర్‌ లను కూడా తయారు చేయవచ్చు.ఆత్మనిర్భర భారత అభియాన్ పేరిట 20 లక్షల కోట్ల ఆర్ధిక ప్యాకేజీ ప్రకటించింది.కానీ అందులో పరిశ్రమల యజమానులకే గానీ , వలసకూలీలకు ఏమీ కేటాయించలేదు.

మన దేశానికి ఎండ వాతావరణం ఒక శాపము వరము కూడా. శ్రామికుల కూలీల సహజ వ్యాధి నిరోధక శక్తి, లాక్‌డౌన్‌ కూడా తోడయ్యాయి. లాక్ డౌన్ కాలంలో మద్యం దొరకలేదు. కానీ లాక్ డౌన్ ముగియ కుండానే ఇంత తొందరగా మద్యం షాపులు ఎందుకు తెరిచారు అంటే కేంద్రం మద్యం అమ్ముకోమని చెప్పింది కాబట్టేనట.మద్యందొరికిందని తాగుబోతులు సంతోషపడుతుంటే తాగుబోతులు దొరికారని కరోనా ఖుషీ అయ్యిందట.సురాపాన, మద్యవ్యాపార ఆదాయం చాలా పెద్దది.ఎవరూ సారాయిని బాహాటంగా సమర్ధించకపోయినా,తాగకపోయినా దాన్ని నిషేధించలేరు. సారాయిలో సక్రమ అక్రమ అనే తేడాలే లేవు. కొందరు నాయకులు మాత్రం మద్యనిషేధం సాధ్యం కాదుఅంటున్నారు. మన రాష్ట్రంలో మద్యం దుకాణాలను తెరిచి తాగుబోతులు గుమికూడటానికి ఆస్కారం ఇచ్చారు. ప్రతి ఏడాదీ 20 శాతం చొప్పున వైన్‌ షాపులు తగ్గించేస్తామన్నారు. 4,380 షాపులను 2934 కు కుదించటం మంచి పనే.సంపూర్ణ మద్య నిషేధం మహిళాలోకంతో పాటు ఎందరో సంతోషించే పని. లిక్కర్‌ ధరలు 25 శాతం పెంచినా తాగుబోతులు ఆగలేదు. లిక్కర్‌ లేనందున లాక్‌డౌన్‌ సమయంలో రోడ్డు ప్రమాదాలు, గృహహింస, పలు రకాల నేరాలు బాగా తగ్గాయి. మద్యం తాగటం వలన వ్యాధులొస్తాయని అందరికీ తెలుసు . మద్యం అమ్మకాలవలన తప్పనిసరిగా మద్యంరోగుల కేసులు పెరుగుతాయి.సమస్త నేరాలు కూడా పెరుగుతాయి. తాగుబోతులకు మళ్ళీ ఆరోగ్యశ్రీ ఎందుకు? బ్రాంది షాపులకు వెళ్లే వారికి షాకిచ్చేలా ఆంధ్రాలో 75 శాతం ,తెలంగాణ లో 11 శాతం పెంచారట.అయినా తాగుబోతులు తగ్గలేదు.మద్యం కొనుగోలు చేసేవారికి ఆరోగ్యశ్రీ ,రేషన్ కార్డు, పెన్షన్ లాంటివి ఆపాలి అంటున్నారు కొందరు. ఏమి ఆపినా తాగుబోతులు ఆగరు అంటున్నారు మరికొందరు.మద్యం అమ్మకాలను నిషేధించలేమని ఆన్ లైన్ లో ఇళ్లకే సప్లై చేయండి అని సుప్రీం కోర్టు కూడా తేల్చేసింది

96 శాతం తల్లిదండ్రులు ఇంగ్లీషు మీడియం కోరితే అది మెజారిటీ ప్రజాభిప్రాయంగా ప్రభుత్వం శిరసావహించింది.తెలుగుమాధ్యమాన్ని కోరే జనం తక్కువైపోయారు కాబట్టి మౌనం దాల్చింది.చివరికి కేరళ ముఖ్యమంత్రి పినరయి లాంటి వాళ్ళు కూడా మద్యము దానివలన వచ్చే ఆదాయమూ కావాలనే అంటున్నారు. ఏసుక్రీస్తును శిలువ వెయ్యండి.బరబ్బా అనే దొంగను విడుదల చెయ్యండి అనే మెజారిటీ ప్రజల అభిప్రాయానికి పిలాతు,హేరేదు తలవంచారు. మాకు మద్యమే కావాలనే తాగుబోతులు చెబుతున్న మద్య ఆదాయ లెక్కలు సినిమాలలో డైలాగులు కూడా అయ్యాయి.ఛీ తాగుబోతుల కోసమా ఇన్నాళ్ళూ నేను సానుభూతి చూపించింది?అని కొంతమంది మనసు మార్చుకున్నారు. భౌతికదూరం అనే మోదీ మాటలు బ్రాందీ షాపుల ముందు పోలీసులు అమలు చేయలేకపోయారు. కోకోకోలా, థమ్సఆప్‌‌ లాంటి కూల్ డ్రింక్స్ లో పురుగుమందులు కలిశాయని తెలిసినా వాటిని త్రాగటం ఆపారా? తాగి తాగి పోతావురాఅంటే , పోనివ్వండీ ఎదవ ప్రాణం ఎప్పటికైనా పోవలసిందేకదా? భోపాల్ లో మిథైల్ ఐసో సైనేట్ , విశాఖలో స్టీరీన్,కోనసీమలో ఓఎన్ జీసీ గ్యాస్ లీకై నిముషాల్లో జనం ప్రాణాలు పోలేదా? మద్యం అంతకంటే విషమా? దీనుల కాపాడుటకు దేవుడే ఉన్నాడు అన్నట్లు కోటిరూపాయలు ఇచ్చైనా సరే సారాయి దుకాణాలను , తాగుబోతులను కాపాడుటకు ప్రభుత్వముంది కదా? తాగుడూ ఉండాలి ఆసుపత్రుల్లో ఆరోగ్యశ్రీ కూడా ఉండాలి.ఇక్కడ చస్తే కదా మరోచోట పుట్టేది? అనివార్య మైన నిరంతర ప్రక్రియ ఇది. తప్పించ వీలుకాని జనన మరణాల చక్రము ఆగదు!ఆగకూడదు అంటాడు.

--- నూర్ బాషా రహంతుల్లా,విశ్రాంత స్పెషల్ గ్రేడ్ డిప్యూటీ కలక్టర్ 6301493266