రాజధానికి సరైన కేంద్రాలు రైల్వే జంక్షన్లే!

రాజధానికి సరైన కేంద్రాలు రైల్వే జంక్షన్లే! (సూర్య 16.2.2020)
రైల్వే జంక్షన్లే రాజధానికి సరైన కేంద్రాలు. చరిత్రలో వీటిని ప్రజల కోర్కెలతో, ప్రజల అవసరాలకు తగ్గట్లు, కాలానుగుణంగా ప్రభుత్వాలే ఏర్పాటు చేశాయి.ఇప్పుడున్న రైల్వే జంక్షన్ స్టేషన్లు ఆంధ్రలో 10 : విజయవాడ, తాడేపల్లి(కృష్ణా కెనాల్) , గుంటూరు,తెనాలి,భీమవరం,గుడివాడ, నిడదవోలు, సామర్లకోట, గూడూరు, నడికుడి. రాయలసీమలో 7: ధర్మవరం, ధోన్, గుత్తి,గుంతకల్లు ,పాకాల,పెనుకొండ, రేణిగుంట. మన సమాజ పురోగతి రైలుమార్గాలవల్లనే ఎక్కువగా జరిగింది.గతంలో ఊరికి రైలు ఉంటేనే కొంతమంది పిల్లనిస్తామనేవారట. సామాన్యప్రజలు కూడా తమప్రయాణాలకు రైలునే మొదట ఎంచుకుంటారు.చాలావరకు మన ప్రయాణ అవసరాలు తీర్చింది,తీరుస్తున్నది రైళ్లే కదా?విమానాలలో అందరూ వెళ్లలేరు.పుట్టపర్తిలో కూడా విమానాశ్రయం ఉంది.పూర్వం రాష్ట్రపెద్దలు తాడేపల్లిగూడెం,దొనకొండ లలోకూడా విమానాశ్రయాలకు ప్లాన్ చేశారు. ఇక గతుకుల రోడ్లపై బస్సులలో కుదుపులు.పదిమందీ కోరేది రైలునే. బెజవాడ (విజయవాడ) నేటికీ జిల్లా కేంద్రం కూడా కాలేదు.విజయవాడ సహజ సంపద రైల్వే జంక్షను కావటమే. రాష్ట్రానికి మూడు రైలు మార్గాల మధ్యస్థానం కాబట్టే విజయవాడను రాష్ట్ర రాజధానిగా చేసుకుందామని ప్రయత్నిస్తున్నారు.రైల్వే జంక్షన్లన్నీ సహజంగానే భవిష్యత్తులో అభివృద్ధి చెందే కేంద్రాలు.వాస్తవానికి అమరావతి అంటే విజయవాడే. గుంటూరు ,తెనాలి,విజయవాడ మూడూ రైల్వే జంక్షన్లే కాబట్టి అన్నీ వైపులనుండీ ప్రజలు ప్రయాణీకులు సులభంగా చౌకగా రాకపోకలు సాగిస్తారు.విజయవాడ ఎప్పుడో జిల్లా కేంద్రం కావలసింది.ఇప్పటికైనా అవబోతోంది సంతోషం.
బ్రిటీషు వాడు తనదేశానికి మన సంపదను తరలించుకుపోవటానికి అనుకూలంగా ఓడరేవులను రాజధానులుగా ఎన్నుకున్నాడని కొందరు చెబుతారు.ఇప్పుడు మనరాష్ట్రం భౌగోళిక స్వరూపాన్నిబట్టి మనం ఆలోచించుకోవాలి.రాజధానిని అన్నీ ప్రాంతాలవాళ్ళూ కోరుకుంటారు.వద్దని ఎవరూ అనరు. అయితే మధ్యస్థానానికి సెంటర్ అని ప్రత్యేకత సహజంగానే వస్తుంది.రాజధానిని అంచుల్లో పెట్టి కూడా అభివృద్ధి చేయవచ్చు,కానీ ప్రజలకు ఆ అంచులో దూరం భారమవుతుంది.ఒకరినొకరు దోచుకున్నారని అసూయలు పడటం కంటే కొత్త రైలు లైన్లు వేయించి జంక్షన్లు సాధించండి.కేంద్రస్థానం మధ్యలో ఉంటే నలువైపులవారికీ సమదూరంలో ఉంటుంది.పార్లమెంటు స్థానాలన్నీ జిల్లాలుగా చేస్తామనే హామీకి భిన్నంగా గురజాల పేరు వినబడగానే నరసరావుపేట వారిలో కలవరం మొదలయ్యింది.బాపట్ల జిల్లా కేంద్రం అయితే మాకు దూరం పెరుగుతుందని సంతనూతలపాడు వాళ్ళు గోలచేశారు.రాజమండ్రి జిల్లాలో కలపమని కొవ్వూరు వాళ్ళు,విజయవాడ జిల్లాలో కలపమని తాడేపల్లి వాళ్లు అడుగుతున్నారు. పార్లమెంటు నియోజకవర్గాలయినా సరే ప్రజలు దూరం పెరిగితే మొరపెడతారు.పాత తాలూకాలను చీల్చి మండలాలను ఏర్పాటు చేసిన ఎన్టీఆర్ ను నేటికీ గుర్తుంచుకొంటున్నారు జనం. రహదారి సౌకర్యం లేనిచోట్ల కూడా రాజకీయ పలుకుబడితో కొన్ని మండలాల కేంద్రాలను ఏర్పాటుచేస్తే ఇప్పటికీ జనం తిట్టిపోస్తున్నారు.అందువలన నలువైపులనుండి ప్రజల రాకపోకలకు రైలు,రహదారి సౌకర్యాలు ఉండటమే మండల కేంద్రాలకు గానీ ,రాజధానినగరానికి గానీ పెద్ద సంపద.వాటిని నిర్ణయించే ముందు పెద్దలుఇలా శాస్త్రీయంగా ప్రజల రోడ్డు రవాణా సౌకర్యాల గురించి ఆలోచించాలి.పూర్వం తెనాలి పక్కన చుండూరు కూడా జంక్షన్ గా ఉండేది.బ్రిటీష్ వాళ్ళు రైలుమార్గాలు తమకు అవసరమనుకున్న ప్రతిచోట్లకూ వేసుకున్నారు.ఆతరువాత రైలుమార్గం రావటం అంటే గొప్ప వారం దొరికినట్లే. నడికుడి-శ్రీకాళహస్తి రైలుమార్గం కోసం కొన్నితరాల జనం ఎదురుచూసి చనిపోయారు.కోనసీమకు నేటికీ రైలులేదు.తిరుమల వెంకటేశ్వరుని దేవాలయం జమ్మూలో కూడా కడతారట.దానివలన తిరుపతి గౌరవం తగ్గుతుందా?జమ్మూ ప్రజలకు ప్రయాణం కొంత తగ్గుతుంది.బ్రాంచీలు పెరగటం ఆయా ప్రాంతాల సౌకర్యాలు పెంచటానికే.
తెలంగాణాలో ప్రజలకు అవసరమైన పాలనామార్పులు చాలా సమయానుకూలంగా చకచకా జరిగాయి.కొత్తగా 23 జిల్లాలు ఏర్పడ్డాయి.ఇప్పుడు మొత్తం 33 జిల్లాలున్నాయి.పార్లమెంటు సభ్యులకంటే ఐ ఏ యస్ కలక్టర్లే ఎక్కువ ఉన్న రాష్ట్రం అది.చిన్నజిల్లాలతో గ్రామీణ ప్రజలకు దూరం భారం తగ్గాయి. జిల్లాలు పెరగటం వల్ల సబ్ కలక్టర్లు ,ఆర్డీవోలు ఉండే డివిజన్లు ,మండలాలు,గ్రామ పంచాయతీలు పెరిగాయి. దగ్గరలో పనులు జరగటం వల్ల ప్రజలలో సంతృప్తి స్థాయి పెరుగుతుంది..జిల్లా రెవిన్యూ అధికారుల వ్యవస్థను రద్దుచేసి వారి స్థానంలో అడిషనల్ కలక్టర్లను నియమించి పంచాయతీ రెవిన్యూ విధులను అందరికీ పంచటం జరిగింది.కొత్త రెవిన్యూ ,పంచాయతీ,మున్సిపల్ చట్టాలను ప్రవేశపెట్టే ప్రయత్నం జరుగుతోంది.సిరిసిల్ల,గజ్వేలు లలో రైలు కూత కూపిద్దామని శపధాలు చేస్తున్నారు.
ఉగాదినాటికి రాష్ట్రంలోని నిరాశ్రయులైన పేదలందరికీ ఇళ్ల స్థలాలు పంచాలని నవరత్నాలలో భాగంగా జగన్ ప్రభుత్వం తలపెట్టింది. 13 జిల్లాల్లో ఉగాది రోజునే మహిళల పేరుతో స్థలాలను రిజిస్ట్రేషన్‌ చేసి పట్టాలు పంపిణీ వేగంగా చేసేందుకు తహసీల్దార్లనే జాయింట్‌ సబ్‌రిజిస్ట్రార్లుగా నియమించారు .ఈ ఇళ్ల స్థలాల రిజిస్ట్రేషన్‌కు సంబంధించిన రిజిస్ట్రేషన్‌ ఫీజు, స్టాంప్‌ డ్యూటీ, యూజర్‌ చార్జీల చెల్లింపు నుంచి లబ్ధిదారులకు మినహాయింపునిచ్చింది.అవసరాన్నిబట్టి రెవిన్యూ వాళ్ళకు రిజిస్ట్రేషన్ బాధ్యతలు ఇచ్చారు.పనులు త్వరగా జరగాలి అంటే పనివిభజన బాధ్యతల విభజన తప్పదు.జిల్లాలవిభజనకూడా పూర్తయితే ఇంకా బాగుండేది.కొత్తగా కొన్ని జిల్లాలు వచ్చేవి.
ఆంధ్రలో కూడా తెలంగాణాను మించి కొత్తజిల్లాలు ఏర్పాటుఅవుతాయనే ఆశలో ప్రజలు ఉన్నారు . గ్రామసచివాలయాలతో గ్రామ స్థాయి ఉద్యోగులు అందుబాటులోకి వచ్చారు. అర్జీల స్పందన ఊపు అందుకోంది.అమరావతి నుండి రాజధానిని ఏ క్షణమైనా విశాఖకు తరలిస్తామని మంత్రి పెద్దిరెడ్డి అన్నారు.60 రోజులనుండి అమరావతిలోనే రాజధానిని కొనసాగించాలని ధర్నాలు చేస్తున్న రైతులకు ఇది బాధాకరంగా ఉంది. ఈ గొడవల్లో కొత్త జిల్లాల ఏర్పాటు గానీ ,జోనల్ కార్యాలయాల ఏర్పాటుగానీ ప్రజలు మరచిపోయారు.కానీ అసలు సమస్యకు ఈ రెండూ చాలా వరకు పరిష్కారం చూపుతాయి. జోనల్ కార్యాలయాలతో సచివాలయ స్థాయి సేవలు కూడా అన్ని ప్రాంతాలకూ విస్తరిస్తాయి. ఈనాటి మండల, డివిజను కేంద్రాలే రేపటి జిల్లా కేంద్రాలు అవుతాయి. నవరత్నాలు ప్రజారంజకంగా ఉన్నాయి,ఆపధకాలన్నీ దీర్ఘకాలంలో మేలుచేసేవే.అయితే పంటిలోనిరాయిలా ఈ రాజధాని తరలింపు సమస్యగా మారింది. ముఖ్యమంత్రి జగన్ ప్రధాని మోడీ దగ్గర మూడు రాజధానుల ప్రస్తావన తెచ్చినట్లు వార్తలొచ్చాయి.ఇప్పటికే లక్షలజనాభాతో పెద్దదయిన తీర నగరాన్ని మరింత జనాభారాన్ని మోపటం అనవసరం.ఎంతపెద్దనగరమైనా అది రైలు జంక్షను కాదు.ఒక అంచులో ఉంది. రాజధానుల అభివృద్ధికి దూరదృష్టి ఉండాలి. ఉత్తరాంధ్ర రాజధాని కోసం శ్రీకాకుళం – విజయనగరం మధ్యస్థానం , రాయలసీమ రాజధాని కోసం మధ్యస్థానం కడప . వీటిని రైల్వే జంక్షన్లుగా అబ్జివృద్ధి చెయ్యాలి. ఆతరువాత రాజధాని కేంద్రాలుగా వాటంతట అవే అభివృద్ధి చెందుతాయి. 
 https://www.facebook.com/photo.php?fbid=3011228035575833&set=a.233025936729404&type=3&theater
 నూర్ బాషా రహంతుల్లా , విశ్రాంత స్పెషల్ గ్రేడ్ డిప్యూటీ కలక్టర్,6301493266

బాధ్యతలేని మాటలు ప్రేలాపనలు ఆపాలి

బాధ్యతలేని మాటలు ప్రేలాపనలు ఆపాలి (సూర్య 9.2.2020)

ఈ మధ్య కొందరు నాయకుల మాటలు విపరీతంగా ఉంటున్నాయి.గోముఖ వ్యాఘ్రాలలాగా విజృంభిస్తున్నారు. అసహన కోరలు చాస్తున్నారు. దేశ శాంతికాముకతను,సెక్యులర్ స్వరూపాన్ని తుడిచిపెట్టే మాటలు మాట్లాడుతున్నారు. నాగార్జునసాగర్ లాంటి నీటిపారుదల ప్రాజెక్టులను ఆధునిక దేవాలయాలు అన్న నెహ్రూను కించపరుస్తూ మాట్లాడుతున్నారు. జాతిపిత మహాత్మాగాంధీని చంపిన గాడ్సే మహానుభావుడని పార్లమెంటు సభ్యురాలు సాథ్వి ప్రజ్ఞాసింగ్ కీర్తిస్తే, మాజీ మంత్రి అనంత కుమార్ హెగ్డే అందుకు వంతపాడాడు.‘ఉపవాస సత్యాగ్రహ’ అనే డ్రామా ద్వారా గాంధీ మహా పురుషుడు అయిపోయారని అన్నారు.ఇందులో గాంధీజీ ప్రస్తావన నేరుగా లేదని ఆయన మరునాడు బుకాయించారు.

2014 లో  గాంధీ జయంతి నాడే స్వచ్ఛభారత్ కార్యక్రమాన్ని మోడీ ప్రారంభిస్తూ ప్రజలలోని శక్తిని సరైన మార్గంలో నడిపించి మార్పును సాధించిన మహానుభావుడు అని గాంధీజీని కీర్తించినా వీళ్ళకు బుద్ధిరాలేదు. జనానీకం ముందు నెహ్రూను గాంధీని విమర్శిస్తూనే ఉన్నారు.తరువాత మరోచోట మేము అలా అనలేదు అంటున్నారు.వీళ్ళకు మహాత్ముని అహింసా వాదం పట్ల లోలోపల ఇంత వ్యతిరేకత ఎందుకో? ఉపవాస సత్యాగ్రహం ద్వారా స్వాతంత్య్ర సాధన అనేది నాటకం కాదు. గాంధీజీ  అయాచితంగా, అనుచితంగా మహాపురుషుడయిపోలేదు. ఆయన అహింస,నిరాడంబరతలకు ప్రతీకగా నిలిచాడు,నడిచాడు.అంబేద్కర్ కూడా అణగారిన వర్గాలకు మేలుచేసే తన మంచి జ్నానము కృషి ఫలితంతోనే గొప్పస్థాయికి చేరాడు.

నోరుఉంది కదా అని ఎలా పడితే అలా మాట్లాడటం మంచిదికాదు . నోరుజారితే తీసుకోలేము.నోరు మంచిదైతే ఊరు మంచిదవుతుంది.ఎదుటివారి మనస్సు నొప్పించే మాట తీరు మంచిదికాదు.మంచి మాటలే మనకు  మర్యాద తెస్తాయి. అందరూ మెచ్చుకునేలా ఆహ్లాదకరంగా మాట్లాడగలగటం గొప్ప వరం. కొందరు నాయకులు నోటితో మాట్లాడుతూ నొసటితోవెక్కిరిస్తూదెబ్బతింటున్నారు. కటువుగా మాట్లాడడం కోటి దోమల పెట్టు అన్నారు.మాటలతో కోటలు సాధించవచ్చు.మాటలతోమంటలురగిలించవచ్చు.వాక్కుకత్తికంటేపదునైనది. ‘మాటకు ప్రాణం సత్యం. మాట తీరును బట్టి మనిషిలోని మంచీ చెడ్డలను అంచనావేయవచ్చు. మృదువుగా మాట్లాడే వారితో వీలైనంత ఎక్కువ సేపు గడపటానికిఅందరూఇష్టపడతారు.మాన్పగలిగితికత్తికోతలు,మాన్పవశమేమాటకోతలు,కత్తిచంపును,మాటవాతలుమానవేనాడుఅన్నారుగురజాడ.పెదవి దాటితే పృథ్వి దాటుతుందన్నారు.అర్థంపర్థంలేని విపరీత వ్యాఖ్యలకు కోపతాపాలకు స్వస్తిపలికి మాటలు కలుపుకొంటే ఎంతమేలు? నోరా వీపుకు దెబ్బలు తేకే అనిసామెత.చెట్టు సారం పండులో వ్యక్తం అయినట్లు-మనిషి సారం మాటలో వ్యక్తం అవుతుంది.

 ముస్లిములకు ఇళ్ళు అద్దెకు ఇవ్వవద్దు అని ప్రవీణ్ తొగాడియా, రాహుల్ గాంధీ ఆవుమాంసం తిని కేదారనాథ్ వెళ్ళినందువల్లనే భూకంపాలు వచ్చాయని సాక్షి మహారాజ్, సోనియాకు తెల్లతోలువల్లనే అధికారం వచ్చింది అని గిరిరాజ సింఘ్, హిందువులు ఎక్కువమందిని కనాలి అని నరేంద్రజైన్, రష్యామహిళతో పంచె కట్టడం కాదు విప్పడం నేర్పిస్తానని బాబూలాల్, గంగానదిలో హిందువులు మాత్రమే స్నానం చేయాలని ముస్లిములకు అర్హతలేదని  సూర్యనమస్కారాలు రానివారు సముద్రంలో డూకండని యోగి ఆదిత్యనాథ్, ఖాన్ త్రయం సినిమాలు చూడొద్దు అని సాధ్వి ప్రాచీ, భారత్ మాతాకీ జై  అనకుంటే లక్షమంది తలలు నరికేవాణ్ణి అని బాబా రాందేవ్ , బూట్లు పాలిష్ చేసినవాళ్ళు పాలిస్తున్నారు అని మధు మిశ్రా, పాక్ ను పొగిడేవారిని బూట్లతో కొట్టి పాక్ కు పంపాలని సాధ్వి బాలికా సరస్వతి , సురేంద్రజైన్,గౌతమ్ గంభీర్ లాంటివారు  అన్నారు.ముస్లిములకు ఓటుహక్కు రద్దు చేయాలని శివసేన కోరింది. పౌరసత్వం కావాలని ఉద్యమాలు చేసే వారిని కుక్కల్ని కాల్చినట్లు కాలుస్తామని ,బాంబులువేస్తామని , 50 లక్షలమంది ముస్లిముల్ని దేశంనుండి పంపేస్తామని దిలీప్ ఘోష్ అన్నారు.ఇలాంటి విపరీత,అనాలోచిత,అనవసర  ప్రేలాపనలు,వ్యాఖ్యలవల్ల ఎవరికీ మేలులేదు, పైగా శాంతి సఖ్యతలను కోరే సామాన్యప్రజలు దూరమౌతారు.

మంచి వక్త సత్యవాక్కుతో చెలిమి చేయాలట. అబద్దాలు చెప్పి అదే నిజమని నమ్మించే వారు నిత్య జీవితంలో మనకు అక్కడక్కడ తటస్థపడుతూనే ఉంటారు.నోరు కల్లలపుట్ట పేరు హరిశ్చంద్రుడు లాంటి నాయకులు దేశానికి ప్రమాదం.ఓదె కట్టే దొంగ పరిగ ఏరే వాడిని బెదిరించినట్లు మెజారిటీ బలంతో తమబుర్రకు తోచిన అబద్దాలను సత్యాలుగా ప్రకటించేపనిలో కొంతమందినాయకులున్నారు.అధికారంలో కొనసాగాలనుకునే ఏ పార్టీ అయినా ఏనాయకుడైనా ప్రజలలో పలచబడకుండా జాగ్రత్తపడాలి.వెనకాముందూ చూసుకోకుండా ఏదిబడితే అది  మాట్లాడే అనుచరగణం వల్ల అధినాయకులకే ముప్పురావచ్చు.కాబట్టి అసత్య ప్రేలాపకుల్ని అనుచరుల్లోనుంచి ఎరిపారేయ్యాలి.

చంపదగినయట్టి శత్రువు,తనచేత చిక్కెనేని కీడుసేయరాదు, పొసగ మేలుజేసి పొమ్మనుటే చాలు లాంటి హితవాక్యాలు వేమన పద్యాలు  చదివి పెరిగిన జాతిమానది. ఎవరైనా శాంతిబాటలోకి రావలసిందే.చివరికి అహింసే పరమధర్మం అని మంచివాళ్లు తేల్చారు.కొన్నేళ్లు బ్రతికి భూమిని వదిలి వెళతామనుకునే భావనతో జ్నానులంతా జీవితం తాత్కాలికమనే అనుకున్నారు కానీ  నియంతలై తమ మాటలతో గానీ చేష్టలతో గానీ ప్రజల ఉసురు తీయలేదు.అందువలన తోటి మానవులకు కీడు చేయటం,పొరుగువాడి నాశనాన్ని కోరుకోవటం మనం ఏర్పాటు చేసుకున్న నాగరిక మానవతా ధర్మాలకు విరుద్ధం. పదవులను వదిలి సత్యంకోసం అడవుల పాలైన రాముడు,బుద్ధుడు పాలకులకు గుర్తు రావాలి.

--   నూర్ బాషా రహంతుల్లా ,విశ్రాంత స్పెషల్ గ్రేడ్ డిప్యూటీ కలక్టర్,6301493266

నదుల్ని మురికి చేయకండి! బాగుచేసుకోండి !

నదుల్ని మురికి చేయకండి! బాగుచేసుకోండి ! (సూర్య 2.2.2020)

 ఎక్కడికక్కడే మురుగు నీళ్ళు,మురికి నదులు దర్శనమిస్తున్నాయి.తల్లీ గోదారికే వెల్లువస్తే అందం,బిరబిరా కృష్ణమ్మ పరుగులిడుతుంటే బంగారు పంటలే పండుతాయి, మురిపాల ముత్యాలు దొర్లుతాయని మురిసిపోయిన జాతి మనది. ఇప్పుడు నదుల్లో  మురికి, చెత్త భయంకరమైన యాసిడ్లు, పారిశ్రామిక వ్యర్థాలు చివరికి మలమూత్రాలు కూడా కలిపేసి చేతులు కడిగేసుకుంటున్నారు. గోదావరి నీళ్ళలో ప్రమాదకర ఈ-కొలి బ్యాక్టీరియా మిల్లీ మీటరుకు 480 ఉన్నట్టు తేలింది. ఇక నదిలో కలిసిన మానవ వ్యర్థాలు పారిశ్రామిక కాలుష్యం, ఆక్వా సాగు,మురుగు, మాల మూత్రాలకు లెక్కేలేదు. నదుల పొడవూనా ఇదే తంతు.సాక్షాత్తూ పభుత్వ యంత్రాంగమే ఈ పాపానికి ఒడిగడుతుంటే ఇక ప్రైవేటు సంస్థల గురించి ప్రత్యేకంగా చెప్పాలా? దీన్ని తక్షణం ఆపకపోతే.సాగు నీటి నుంచి తాగు నీటి వరకూ వరకూ అన్నింటికీ నదుల మీదే ఆధారపడిన ప్రజల భవిష్యత్తు ఏం కానుంది?
స్వచ్ఛ భారత్ , చేతులు పరిశుభ్రంగా కడుక్కోవాలని చెప్తున్నారు కానీ నేరుగా గొంతులోకే గరళం పంపేస్తున్నారు.
జనం దాన్నే జీవజలంగా తాగుతూ ప్రాణాల మీదికి తెచ్చుకుంటున్నారు. చరిత్రలో నాగరకతలన్నీ నదుల ఒడ్డున వెలిశాయి. నగరాలకు నదులు నీటి ఆధారాలయ్యాయి. మన నదుల్లో ఆక్సిజన్‌ స్థాయి తగ్గింది.నదుల్ని దేవతలుగా కొలిచే సంప్రదాయం ప్రజల్లో ఉంది. నదిలో స్నానమాడితే పాపాలు హరించు కుపోతాయన్న విశ్వాసాలున్నాయి. మహాకవి నన్నయ,తిక్కన నదుల ఒడ్డునే కావ్యాలు రాశారట. కానీ ఇప్పుడు నది ఒడ్డున నగరం ఉండటమే పెద్ద ప్రమాదంగా తయారైంది.నగరం నది ఒడ్డున ఉన్నదంటే ఆ వూళ్ళోని వ్యర్ధాలు, కాలుష్యాలన్నీ నది ఒడిలోకి చేరతాయి. నదీ స్నానాన్ని పరమ పవిత్రంగా భావిస్తాం.భక్తులే కొన్ని నదుల్లోని ఘాట్లలో తమ ధీక్షా దుస్తులు ,పూజా సామాగ్రి లాంటివి వదిలి వాటిని మురికి కాసారాలుగా చేస్తున్నారు.
పరిశ్రమల నుంచి రసాయన వ్యర్థాలు భారీఎత్తున నదిలో కలిసిపోయి నీళ్లు రంగు మారిపోయి కనబడుతున్నాయి. దుర్వాసన,విషాలతో కూడిన ఈ నీటినే తాగి ప్రజలు రోగాలకు గురవుతున్నారు. థర్మల్‌ విద్యుత్కేంద్రాలు, బీరు ఫ్యాక్టరీల  నుంచి విడుదలయ్యే నీటిని శుద్ధి చేశాకే వదులుతున్నట్టు నిర్వాహకులు పగలు చెబుతూ,రాత్రికి వ్యర్థాలను నేరుగా నదిలో  కలిపేస్తున్నారు.ఇక ప్రజలు బట్టలుతకటం,పాత్రలు తోమటం వల్ల ఇళ్ల నుంచి వచ్చే మురికి నీరంతా ఓపెన్‌ డ్రెయిన్‌లో కలిపి, అక్కడ్నించి నదిలోకి వదిలేస్తున్నారు. ప్రభుత్వమే ఇలాంటి మురికి పనులు చేస్తోంది. కొన్ని వేల కుటుంబాలకు మరుగుదొడ్లు లేవు. మల మూత్రాలు, మరుగు దొడ్లలోని నీటిని కూడా నదిలోకే చేరుస్తున్నారు.ఆ చుట్టుపక్కల ఇప్పుడు బోర్లు వేస్తే మంచినీళ్లు పడని దుస్థితి నెలకొంది.లక్షల మందికి అదే విషం!వీరందరికీ అందుతున్నది నదీజలం కాదు- మానవ వ్యర్థాలు, పారిశ్రామిక కాలుష్యం, ఆక్వా పురుగు మందులతో కశ్మలమైపోయిన గరళం!ఈ త్రాగునీటివల్ల నీళ్ల విరేచనాల నుంచి క్యాన్సర్‌ వరకూ నానా జబ్బులు ప్రజలను పీడిస్తున్నాయి.

కాలుష్యం ఒక నది నుంచి మరో నదికి చేరిపోతోంది. నదిలోకి కలుషితాలను వదిలేందుకు ఏ పరిశ్రమకూ అనుమతులు ఉండవు.కొన్ని పరిశ్రమలు రాత్రిపూట, నదీ ప్రవాహం అధికంగా ఉన్న సమయాల్లో నదిలోకి వదిలేస్తున్నాయి. జీవధారలు, వరప్రదాయినిలు అయిన నదుల్ని కాలుష్య కాసారాలుగా మారుస్తున్నాయి. దేశవ్యాప్తంగా నదుల్ని పరిరక్షించడానికి రూ. 33,000 కోట్లు అవసరమని కేంద్ర ప్రభుత్వం సుప్రీంకోర్టుకు తెలిపింది. ఇప్పుడది రెట్టింపు దాటిపోతుంది.ఇంత పెద్దస్థాయిలో సొమ్ము వెచ్చించడం పెదదేశానికి సాధ్యమవుతుందా?

నదులు ప్రజలకు జీవన దాతలు. కాబట్టి దేశంలో అటువంటి జీవజల నదుల్లోని నీరు విషకలుషితం కాకుండా కాపాడుకోవాలి.వందలాది నదులలో తగినంత నీరు లేదు. జలప్రవాహాల్ని చేజార్చుకుంటే మున్ముందు మిగిలేది కన్నీరే.దేశవ్యాప్తంగా అనుదినం మూడున్నర వేలకోట్ల లీటర్లకు పైగా కలుషిత వ్యర్థాలు నదుల్ని మురికి కూపాలుగా మార్చేస్తున్నాయి. వందలాది మురికి పరిశ్రమల్ని కట్టడి చేసినా ‘నమామి గంగే’ ప్రాజెక్టు విఫలమయ్యింది. జరగాల్సింది మరెంతో ఉంది. నదులు కూడా మనుషుల్లాగా జీవనహక్కు కలిగిన వ్యవస్థలంటూ ఉత్తరాఖండ్‌ ఉన్నత న్యాయస్థానం చరిత్రాత్మక తీర్పు ఇచ్చింది. దేశంలోని నదులన్నిటినీ మనుషుల్లాగా  చట్టబద్ధంగా రక్షించుకోవాలి. దేశం లోని 275 అంతర్రాష్ట్ర నదులు కలుషితమై ఎవరికీ పనికిరాకుండా పోయాయని కేంద్ర కాలుష్య నియంత్రణ మండలి చెప్పింది.

పందొమ్మిది ఐరోపా దేశాల్లో ప్రవహించే డాన్యూబ్‌, ఆరు దేశాలగుండా వెళ్లే రైన్‌ నదులను ఒక మంచి వ్యూహంతో బాగుచేసుకున్నారు.1958లో ఒక్క చేపపిల్లా బతకలేని దుస్థితిలో మగ్గిన ఇంగ్లాండ్‌ లోని థేమ్స్‌ నది నేడు నూట పాతిక రకాల మత్స్య జాతులకు నెలవయ్యింది. అలాగే దక్షిణ కొరియా సియోల్‌ లోని చంగెచాన్‌, మెక్సికోలోని  లా పియెదాద్‌,బ్రిటన్ లోని  క్వాగీ లాంటి నదులన్నీ బాగుచేసుకున్నారు.అలా మన నదులకు కూడా ప్రాణప్రతిష్ఠ జరపాలి. యమున మృతనదిగా మారిపోయిందట . సరస్వతీ నది కనుమరుగైపోయిందట.ఇసుక మాఫియా, దురాక్రమణలు, వ్యర్థాల బారిన పడి మృతనదిగా మారిన కుట్టెంపెరూర్‌ను కేరళలోని అలప్పుజ ప్రజలు రెండు నెలలు శ్రమించి బాగు చేసుకున్నారు. ఇలాంటి ప్రజల భాగస్వామ్యం ఉంటే ఎన్నో నదులు జవజీవాలు పొంది ప్రాణప్రదాతలుగా నిలబడతాయి. ఇప్పటికైనా జలసంరక్షణ ప్రజాఉద్యమంగామారాలి. నదీనదాలు,కాలువలు,వాగులు,చెరువులు,దొరువులు మంచినీళ్ళతో నిండాలి.రాబోయే వేసవిలో నీటి కటకటను పారదోలాలి.

--  నూర్ బాషా రహంతుల్లా ,విశ్రాంత స్పెషల్ గ్రేడ్ డిప్యూటీ కలక్టర్ 6301493266  

2 వేల కుబేరులు - 460 కోట్ల కుచేలులు (సూర్య 26 1.2020)

2 వేల కుబేరులు - 460 కోట్ల కుచేలులు

“మాకండలు ఒడిసిన రుధిరం
 మీ గుండెలు నిండిన మధురం
మీ మోటారు లేపిన గాలి
 మా మోమున పోసేను ధూళి
పైకిపోవు మేడలు మీవి
కూలిపోవు గుడిశలు మావి”
ఈ గేయం ఎవరురాశారో గానీ నిజమేకదా అని నాకు మనసులో ముద్రపడ్డాయి.

“ కలిగినవానికే యియ్యబడును
వానికి సమృద్ధి కలుగును;
లేనివానికి కలిగినదియు
వానియొద్దనుండి తీసి వేయబడును” (మత్తయి 13:12)
అనే వాక్యం చదివినప్పుడు దేవుడికి ఇది న్యాయమేనా ? అనిపించిది.

నిజానికి మేడిపండు లాగా ఉంది మన ఆర్ధిక వ్యవస్థ. ఎందుకంటే కార్మికుల ఆదాయం 2 శాతం పెరిగితే సంపన్నుల ఆదాయం 600 శాతం పెరుగుతోందట. ఒక పక్క కుబేరులు మరోపక్క కుచేలులు.ఈ ఆర్ధిక అసమానతలను రూపుమాపటంకోసం ఉపాధిహామీ,జన్ ధన్,దీనదయాల్ ఉపాధ్యాయ గ్రామీణ నైపుణ్య యోజన,స్టాండ్ అప్ ఇండియా లాంటి ఎన్ని పథకాలు అమలుచేసినా అంతరాలు తొలగటమే లేదని ఐరాస రిపోర్టు . ప్రపంచ సంపద పెరిగిందట.ఆ సంపాదనంతా 2,153 మంది శత కొటీశ్వరుల దగ్గర పోగుపడిందట. ప్రపంచ జనాభాలో 60 శాతం అంటే 460 కోట్ల మంది దగ్గర ఉన్న సంపదతో ఇది సమానం.ఇండియాలో అయితే 63 మంది కుబేరుల చేతిలో 24 వేల కోట్ల సంపద పోగుపడిందట.ఇది భారతీయ బడ్జెట్ మొత్తంతో సమానం.96 కోట్ల మంది కుచేలుల సంపద కంటె నాలుగు రెట్లు ఎక్కువ. ఒక వైపు కుబేరులు అపర కుబేరులుగా మారుతుంటే, మరో వైపు కోటానుకోట్ల పేదలు కటిక దరిద్రులుగా మారుతున్నారు. కర్షకులు, శ్రామికులు పేదరికంలో మగ్గుతూ ఉంటే, ఆర్థిక మాంద్యంలో కూడా కుబేరులు ఎన్ని తరాలు తిన్నా తరగని ఆస్తులను సంపాదిస్తున్నారు.సంపన్న వర్గాల మహిళలతో పోల్చితే నిరుపేద మహిళల ఆయుఃప్రమాణం 15 ఏళ్లు తక్కువట. జీవనోపాధికి లంచం కట్టాల్సి వస్తోంది.కష్టార్జితంలో విద్య, వైద్యాలకే సగం పోతున్నది.ఫీజులు, చార్జీలు, పన్నులు. పెరుగుతున్నాయి. ఇవి తగ్గించని ప్రభుత్వాలు కార్పొరేట్లకు, సంపన్నులకు భారీ రాయితీలు ఇస్తున్నాయి. పన్ను ఎగవేసినా ఆమ్నెస్టీ స్కీమ్‌ క్షమాభిక్ష పథకం ఇస్తూ ఉంది. ప్రభుత్వ రంగ సంస్థలను కారు చౌకగా కార్పొరేట్లకు అమ్మేస్తూ ఉంది. కుబేరుల వద్ద పోగుపడుతున్న ఈ సంపదంతా కార్మికుల శ్రమ దోపిడీ వల్ల వచ్చిందేనట.
నిరుద్యోగులు 50 కోట్ల మందట.స్వాతంత్య్రం వచ్చి 73 ఏళ్లు కావస్తున్నా పేదరికం, నిరుద్యోగం, దేశాన్ని వదలలేదు. మన తరువాత రెండేళ్లకు స్వాతంత్య్రం పొందిన, మనకంటే ఎక్కువ జనాభా కలిగినా చైనా మానవాభివృద్ధి సూచికల్లో మనకంటే మెరుగైన సామర్థ్యం కనబరుస్తున్నది.అనేక వస్తువులు ఇప్పటికీ చైనా నుంచి దిగుమతి చేసుకుంటున్నాం.దేశ ప్రజలకు విస్తృత సేవలందించిన ప్రభుత్వ రంగ టెలికాం సంస్థ లాంటివెన్నో ప్రైవేటు పాలయ్యాయి.'మాట్లాడుతూనే ఉండండి' అంటూ ప్రైవేటు సంస్థలు ప్రజలను ఆకట్టుకొని బలిసిపోయ్యాయి. ప్రభుత్వానికి కట్టవలసిన 92 వేల కోట్లు కట్టకుండా సుప్రీంకోర్టును క్యురేటివ్‌ పిటిషన్ల ద్వారా గడువు కోరుతున్నారు.మరిన్ని రాయితీలు కావాలట. ఇన్నిరాయితీలు ప్రభుత్వ సంస్థలకే ఇచ్చి ఉంటే బాగుండేదికదా? ప్రైవేటు టెలికాం కంపెనీలేవీ ప్రభుత్వానికి చెల్లించాల్సిన మొత్తాన్ని కట్టలేదు. ప్రైవేటు టెలికాం సంస్థలు ప్రభుత్వ అంతరిక్ష ప్రయోగాల ఫలితంగా లభించిన అత్యున్నత సాంకేతికతను,5జి స్పెక్ట్రమ్‌, జి.పి.ఎస్‌ వంటి ఎన్నో ప్రయోజనాలను ఊరికే వాడుకుంటున్నాయి.ప్రజలకు మాత్రం రీఛార్జ్‌ చేయకుండా ఒక్క నిమిషమైనా అవి ఉచితంగా సేవలందించవు.ఇప్పుడు జనాభాతో సమానంగా మొబైల్‌ ఫోన్లు ఉన్నాయి.కాలం గడిచేకొద్దీ దేశ జనాభా కన్నా ఫోన్ల సంఖ్య ఎక్కువవుతోంది. ఫోన్ల వినియోగం పెరుగుతున్న కొద్దీ పెరిగే ఆదాయమూ ప్రైవేటు సంస్థలదే! అయినా తాము చెల్లించవలసిన బకాయిలను చెల్లించడంలేదు.పన్ను బాకీలు కట్టకపోతే సమాజానికి అన్యాయం చేసినట్లేనని సుప్రీంకోర్టు ప్రధాన న్యాయమూర్తి వాపోయారు. పైగా 5జి స్ప్రెక్టమ్‌కు పోటీ పెడుతున్నారు.డిజిటల్‌ ఇండియా ఆగిపోతుందని హెచ్చరిస్తున్నారు.కార్పొరేట్‌ న్యాయం అంటే ఇదేనా? జిడిపి పెరుగుదల దెబ్బ తిని పోతుందంటున్నారు! కార్పొరేట్లు కట్టాల్సిన రుసుములు కట్టకపోతే దేశ ఖజానాకి కన్నం పడదా? కార్పొరేట్ల దేశభక్తి ఇదేనా?
దారిద్య్రం, నిరుద్యోగ నిర్మూలన, సంపన్నులు పేదల మధ్య అసమానతల తొలగింపు ఎలా జరుగుతుంది? నిరుద్యోగులు చేయడానికి పనులు లేక తీవ్ర ఇబ్బందులు పడటం సామాజిక అశాంతికి దారి తీస్తుంది.రానున్న రోజుల్లో మరిన్ని కష్టాలు తప్పవు.ఈ ఏడు నిరుద్యోగులు మరో 25లక్షలు పెరుగుతారట. మాంద్యం అంటే కూలీలు పెరుగుతారు, మార్కెట్‌లో తగినన్ని ఉద్యోగాలు ఉండవు.శ్రేయోదాయక రాజ్యంలో కూలీలందరికీ తగిన పని ,మెరుగైన జీవితాలు, సామాజిక న్యాయాన్ని కల్పించాలి,మంచి కార్మిక ప్రమాణాలను రూపొందించాలి. 28.5 కోట్ల మంది తమ సామర్థ్యానికి తగిన పని దొరక్క ఉసూరుమంటున్నారు. 50 కోట్ల ప్రపంచ నిరుద్యోగులలో 27 కోట్లమంది 25 సంవత్సరాలలోపు వయస్కులేనట. వీళ్ళు ఉపాధి శిక్షణాకోర్సులలో గానీ, వృత్తివిద్యకోర్సులలో గానీ ఎటువంటి నైపుణ్య శిక్షణ పొందలేదట.60 శాతం కూలీలు రోజుకు రూ.200 లోపు ఆదాయంతో అసంఘటిత రంగంలో ఉన్నారు. 36 కోట్లమంది పేదరికంతో బతుకులీడుస్తున్నారు. ఇక మనదేశ నిరుద్యోగ రేటు 7.5 శాతం.చదువుకున్న యువతలో నిరుద్యోగ రేటు 9 శాతం. గ్రామీణ భారతంలో నిరుద్యోగ రేటు 6.8 శాతం.నిరుద్యోగం గ్రామీణ భారతంలో 66 శాతం. పట్టణ యువతలో చదువుకున్న వారిలో నిరుద్యోగరేటు 37 శాతం. నిరుద్యోగులుగా వున్న గ్రాడ్యుయేట్లు 60శాతం. కోటి విద్యలూ కూటికొరకే అని పెద్దల సామెత.రానురానూ చదువు కున్న నిరుద్యోగులు పెరిగిపోతున్నారు. ఇలాంటి వాళ్ళకు సరైన ఉద్యోగాలు ఎప్పుడు దొరుకుతాయి?అసలు ఇప్పుడున్న నిరుద్యోగులకు ఉద్యోగకల్పనా దిశగా ప్రభుత్వ ప్రణాళికలు ఏమిటి? నీవునేర్పినవిద్యయే నీరజాక్షీ అన్నట్లు నిరుద్యోగులు ఇంగ్లీషులో దబాయిస్తున్నారు. ఈ నిరుద్యోగుల పెరుగుదల సామాజిక అశాంతికి దారితీస్తుందని ఐఎల్‌వో అభిప్రాయపడింది.దేశంలో ఇప్పటికే పౌరసత్వసవరణ చట్టాల వ్యతిరేక ఉద్యమాల వల్ల అశాంతి ఉంది. అగ్గిమీద గుగ్గిలంలా ఈ నిరుద్యోగ సమస్య తోడయ్యింది.దారిద్యరేఖకు దిగువన ఉన్న కుటుంబాలన్నీ తమ దరిద్రాన్నీ,నిరుద్యోగ సంతానాన్నీ , తమ తలరాతగా భావిస్తూ విధాతను తిట్టుకుంటున్నారు. తమ పక్కనే విలాసజీవితాలు గడుపుతున్న కుబేరులను చూసి కుళ్లుకుంటున్నారు. సామాన్య ప్రజలు ఏమీ చేయలేని పరిస్థితి నివురుగప్పిన నిప్పులా ఉంది.పేదలలో ఉపాధి కోసం పరమేశా గంగ విడుము పార్వతి చాలు! లాంటి వేడుకోళ్ళు దేశంలో నలుదిశలా వెల్లువెత్తుతున్నాయి. కాబట్టి ఉన్నవాళ్ళు లేనివాళ్లను చూడాలి.సంపన్న దేశాల దాతృత్వం పెరగాలి.మనదేశంలో కూడా సంపన్నుల దాతృత్వం పెరగాలి. ఇక్కడ సంపాదించి విదేశాలకు పారిపోయినవారి ఆస్తుల్ని ,నల్లధనాన్ని పట్టుకొచ్చి మన పేదలకు పంచాలి.మన నాయకులు అధికారులలో అవినీతి,దుబారా తగ్గాలి.పొదుపు పెరగాలి. స్పందన ,ఇంటికే పెన్ షన్,ఆరోగ్యశ్రీ,మద్యనిషేధం లాంటి పథకాలు పెరగాలి. మీరు ఎక్కువమంది పిల్లల్ని కనండి ఉద్యోగాలు ఇస్తాం లాంటి దొంగవాగ్ధానాలు చెయ్యకుండా , దేశ ప్రజల క్షేమం సౌభాగ్యం కోసం ఇంటికి ఒక్క బిడ్డ చాలు అనే కుటుంబ నియంత్రణ కార్యక్రమాన్ని ఖచ్చితంగా అమలుచెయ్యాలి.
 నూర్ బాషా రహంతుల్లా ,విశ్రాంత స్పెషల్ గ్రేడ్ డిప్యూటీ కలక్టర్,6301493266

మానవహక్కుల్ని కాపాడాలి

మానవహక్కుల్ని కాపాడాలి (సూర్య 19,22.1.2020)
రాజధానిని అమరావతి నుండి తరలించవద్దని అహింసాయుత ధర్నాలతో పోరాడుతున్న వారిపై పోలీసులు బలప్రయోగం చేస్తున్నారని వారితో చర్చలు జరపాలని మానవ హక్కుల వేదిక డిమాండ్‌ చేసింది.ఇదేసమయంలో జమ్మూకాశ్మీర్ మీడియాకు మాట్లాడే స్వేచ్ఛ ఉంటుందని సుప్రీంకోర్టు వ్యాఖ్యానించింది. కర్ఫ్యూ విధించకుండా 144 వ సెక్షన్ విచ్చలవిడిగా విధించకూడదనీ తెలిపింది.తెలంగాణ భైంసాలో ఇరువర్గాల ప్రజల్లో హింసాత్మక గొడవలు చెలరేగి అక్కడ 144 సెక్షన్ విధించారు. ఆ గొడవల్లో వీధుల్లో పార్క్ చేసిన వాహనాలు, బైకులు, ఆటోలు,కార్లకు,ఇళ్లకు నిప్పంటించారు. అక్కడున్న ప్రజలు తీవ్ర భయబ్రాంతులకు గురయ్యారు. డిల్లీ జేఎన్‌యూలో కలహాలను రేపిన గూండాలను,దుండగులను కఠినంగా శిక్షించకపోగా ఫోనులు,ఇంటర్నెట్ ఆపేశారట.ప్రత్యేకహోదా పోరాటం ఎటోపోయింది.ఎటుచూసినా చివరికి అమరావతి గ్రామాల్లో కూడా మానవహక్కుల పోరాటాలే కోర్టులదాకా వెళ్ళాయి. హింసలేని శాంతియుత నిరసనలపై 144 సెక్షన్,పోలీసు కవాతులు ఎందుకని హైకోర్టు ఆగ్రహించింది.దాడుల వార్తలు సుమోటోగా స్వీకరించింది.తప్పుచేసిన పోలీసులపై వెంటనే చర్యలు తీసుకోవాలంది.శాంతియుత ఉద్యమాలను అడ్డుకోవద్దు అని హితవు చెప్పింది. ఇళ్లలోకి వెళ్లి ప్రజలను ఇబ్బంది పెట్టొద్దు , గ్రామాల్లో పోలీసులతో కవాతు ఎందుకు?ఆ గ్రామాల్లో ఏమైనా కర్ఫ్యూ విధించారా? ప్రశాంతంగా నిరసన తెలియజేస్తుంటే పోలీసులు ఎందుకు అడ్డుకుంటున్నారు? మహిళల్ని మగ పోలీసులు అరెస్టు చేస్తారా? చట్ట నిబంధనలు ఇలా చేయమని చెబుతున్నాయా? మనం ప్రజాస్వామ్యదేశంలో ఉన్నామనేది మరిచిపోయారా? పౌరులకు నిరసన తెలిపే హక్కు ఉందన్న విషయం గుర్తుందా? నిరసనకారులపై పోలీసులు వ్యవహరించిన తీరు సీఆర్‌పీసీ సెక్షన్‌ 46కు విరుద్ధం అని హైకోర్టు చీఫ్‌ జస్టిస్‌ జేకే మహేశ్వరి బెంచ్‌ వ్యాఖ్యలు చేసింది.
పౌరుల ప్రాథమిక హక్కులను, మానవ హక్కులను పరిరక్షించేందుకు హైకోర్టు ఈ మధ్యంతర ఉత్తర్వులు,మార్గదర్శక సూత్రాలు జారీ చేసింది:
.
జీవనోపాధి నిమిత్తం ప్రజలను వారి వారి ఇళ్ల నుంచి స్వేచ్ఛగా బయట తిరగనివ్వాలి.శాంతియుత నిరసనలకు అనుమతి ఇవ్వాలి.గ్రామ దేవతలకు, ఇతర దేవుళ్లకు తమ తమ ఆచార వ్యవహారాలు, సంప్రదాయాల ప్రకారం పూజలు చేసుకునేందుకు ప్రజల్ని అనుమతించాలి.సీఆర్‌పీసీ నిర్దేశించిన నిబంధనల మేర తప్ప, గ్రామస్థుల ఇళ్లలోకి వెళ్లి తనిఖీలు చేయరాదు.అరెస్టుల విషయంలో సీఆర్‌పీసీ సెక్షన్‌ 46ను తప్పక పాటించాలి.నిరసనకారులను అరెస్టు చేసి పోలీస్‌ స్టేషన్లలో అక్రమంగా నిర్బంధించిన పోలీసులపై విచారణ జరపాలి.గాయపడినట్లు పత్రికలు, టీవీల్లో కనిపించిన వారికి తక్షణమే వైద్యసదుపాయం కల్పించాలి.అరెస్టు చేసిన వ్యక్తులను తక్షణమే సంబంధిత మేజిస్ట్రేట్ల ముందు హాజరుపరచాలి.సుప్రీంకోర్టు మార్గదర్శకాలు, సీఆర్‌పీసీ సెక్షన్‌ 46 తదితరాలను ఉల్లంఘించిన పోలీసులపై విచారణ జరపాలి. వారిపై చట్ట ప్రకారం చర్యలు తీసుకోవాలి.చట్టాన్ని అమలు చేయని సహచర సిబ్బందిపై ఎందుకు చర్యలు తీసుకోలేదో అలాగే ప్రభుత్వ చర్యలపై శాంతియుతంగా ప్రజలు నిరసన తెలియజేస్తుంటే 144 సెక్షన్‌ ఎందుకు విధించాల్సి వచ్చిందో ప్రభుత్వం కోర్టుకు వివరణ ఇవ్వాలి.
న్యాయం ఎవరికైనా ఒకటే.ఆంక్షల చట్రంలో నలుగుతున్న జమ్మూ కశ్మీర్‌కు సర్వోన్నత న్యాయస్థానంలో ఉపశమనం దొరికింది. భావప్రకటనా స్వేచ్ఛకు గ్యారెంటీ ఇస్తున్న రాజ్యాంగంలోని 19వ అధికరణ పరిధిని విస్తృతం చేస్తూ సుప్రీంకోర్టు చరిత్రాత్మక నిర్ణయం తీసుకుంది. జస్టిస్‌ ఎన్‌వీ రమణ నేతృత్వంలోని త్రిసభ్య ధర్మాసనం వెలువరించిన తీర్పు ఇంటర్నెట్‌ సేవల పునరుద్ధరణకు తోడ్పడింది.జమ్మూ కశ్మీర్‌కు ప్రత్యేక ప్రతిపత్తిని కల్పిస్తున్న 370వ అధికరణాన్ని రద్దు చేసి, రాష్ట్ర ప్రతిపత్తిని మార్చి కేంద్రపాలిత ప్రాంతంగా చేసినప్పుడు అక్కడ అల్లర్లు జరగొచ్చుననే సాకుతో నెలల తరబడి ఇంటర్నెట్, ఫోన్‌ సదుపాయాలను అడ్డుకొన్నారు. మొబైల్‌ సర్వీసుల పునరుద్ధరణ ఇంటర్నెట్‌ పునరుద్ధరణ ఇంతవరకూ పూర్తికాలేదు. సుప్రీంకోర్టు ఇచ్చిన తాజా తీర్పు పర్యవసానంగా ఇంటర్నెట్‌ను నిలిపేసే ప్రభుత్వాల తీరు మారక తప్పదు. ప్రభుత్వాలు ఇంటర్నెట్‌ను ఆపకుండా సుప్రీం అడ్డుపడింది. 2011లో గూగుల్, యాహూ, ఫేస్‌బుక్‌ లను ప్రభుత్వ వడబోత తర్వాతే ఏ సమాచారాన్నయినా, వ్యాఖ్యలనైనా తమ సైట్లలో ఉంచాలని ఆనాటి కేంద్రమంత్రి కోరారు. శాంతి భద్రతల కోసం ఇంటర్నెట్‌ సేవలు ఎక్కడికక్కడ నిలిపేస్తున్నారు. సుప్రీం తీర్పు అలాంటి చర్యలను ప్రశ్నించడానికి పౌరులకు అవకాశం ఇచ్చింది. ఎంతకాలం ఆపుతారన్న స్పష్టత లేకుండా నిరవధికంగా ఈ సేవలను నిలిపేయడం టెలికాం నిబంధనలకు విరుద్ధమని తెలిపింది. అవసరమా, అనవసరమా అనేదానితో నిమిత్తం లేకుండా 144వ సెక్షన్‌ విధించే తీరును కూడా ధర్మాసనం తప్పుబట్టింది.సహేతుకమైన శాంతియుత నిరసనలను ఎందుకు అణచాలి? చీటికీ మాటికీ 144 సెక్షన్‌ విధిస్తున్నారు. 144 సెక్షన్‌కు సంబంధించిన ఉత్తర్వులను కూడా వారం రోజుల వ్యవధిలో సమీక్షించాలని ఆదేశించారు. అయితే భావప్రకటనా స్వేచ్చను అలుసుగా తీసుకొని ఇంటర్నెట్‌లో దుర్వ్యాఖ్యలు, దుష్ప్రచారాలు, విద్వేషపూరిత రాతలు, వగైరా అంశాలు పెట్టినవాళ్లపై చర్యలు తీసుకొని వాటిని ఆపాలి అదుపు చేయాలి. సహేతుకమైన శాంతియుత అసమ్మతి గొంతు నొక్కకూడదు.
మూకదాడులు,హింసా ప్రవృత్తిని కఠినంగా అణచివేయాలి. కోడిపందాలు,పందుల పందాలు, జల్లికట్టు లాంటివాటికి పండుగలు సంప్రదాయాల పేరుతో రాజకీయనాయకులు సినిమానటులు కూడా వెళ్ళి పాల్గొంటున్నారు.మూగజీవాల ప్రాణాలకూ హక్కులుంటాయని గతంలోనే తీర్పులు ఉన్నప్పటికీ ఎవరూ లెక్కచేయటంలేదు.హింసతో కూడిన ప్రాణాంతకమైన బలులు, సతీసహగమనం లాంటి ఆచారాలను,సంప్రదాయాల్నీ,పనుల్ని సభ్యసమాజం ఏనాడో తిరస్కరించింది.
సర్వోన్నత న్యాయస్థానం ఆదేశాలు దేశం మొత్తానికీ వర్తిస్తాయి.అన్ని మతాల పౌరుల ప్రాధమిక హక్కుల్ని కాపాడమనే కోర్టుల న్యాయ సూత్రానికి ప్రజలు జేజేలు పలుకుతున్నారు. ఇస్లాం అంటేనే శాంతి.సహనావవతు
సహనౌభునక్తు అనే ఉపనిషత్తు శ్లోకాల సారం శాంతే. మన ఇద్దరినీ దేవుడు రక్షించు గాక. మనల నిద్ధరిని పోషించు గాక. మన మిద్దరం ఎప్పుడును ద్వేషము లేకుండ ఉండెదము గాక అని. నిన్నువలే నీ పొరుగువాడిని ప్రేమించు లాంటి శాంతి మంత్రాలను ప్రజలు ప్రభుత్వము ఇద్దరూ పాటించాలి.అహింసకు పెట్టనికోటలాంటి మన రాజ్యాంగ సూత్రాలను కాపాడుకుందాం.రాజ్యాంగమే ప్రజలకు రక్ష.
-- నూర్ బాషా రహంతుల్లా,విశ్రాంత స్పెషల్ గ్రేడ్ డిప్యూటీ కలక్టర్,6301493266